Adjunto Komandante Marítima iha Protesaun Sivil, Serafim da Costa hatete, uma hirak ne’ebé hetan estragus husi dezastre naturais hanesan anin, udan no ahi-han, mai hus munispiu lima.
Nia dehan, munisipiu lima ne’ebé hetan dezastre naturais mak hanesan Dili, anin sobu uma 27 no ahi-han uma ida, Bobonaro ahi-han uma 2, Líkisa anin sobu uma 11 no ahi-han uma ida.
Aleinde, iha Manufahi anin sobu uma ida no rai lakan hamate ema ida no iha Vikeke, udan ho anin boot rejulta ai hanehan uma 2.
"Normalmente SEPS apoiu ba vitima dezastre sira ne'e, depois halo levamentu apoiu emerjensia no halo levamentu dadus verifika uma ne'ebe hetan estragus,” dehan nia iha Salaun SEPS Kaikoli, Tersa (24/01).
Nia hatutan, akontese ahi-han uma ne'e kauza husi sirkuit eletrisidade, tanba iha komunidade balun hakarak eletrisidade liga direita, entaun bele akontese sirkuit no ikus mak ahi tenki han uma.
Nia haktuir, iha faze dahuluk vitíma sira hetan ona apoiu emerjensia hanesan, hahan no mós sasan dapur nian.
Tan ne’e, ba rekoperasaun, Autoriedade Protesaun Sivil husi ekipa munisipiu sei kontinua halo verifikasaun ba uma sira ne'ebé hetan estragus hafoin bele apoiu material rekoperasaun ba komunidade sira.
Enkuantu, dadus Semana ida ne'e ba munisipiu lima de'it no munisipiu sira seluk seidauk iha informasaun, tanba informasaun ne'e husi autoridade Protesaun Sivil munisipiu mak pasa mai Protesaun Sivil nasionál.
Tanba ne'e, Autoriedade Protesaun Sivil (APC) servisu hamutuk Meterolojia Timor-Leste nian informa ba komunidade sira katak hahú iha 16 to'o 23 Fulan-Janeiru situasaun la'o normal no moderadu, maibé iha parte balun mak anin no udan akontese.
Ho nune'e APC nafatin husu ba komunidade sira ne’ebé halo viajen husi Dili ba Atauro no husi Dili ba Oekuse atu nafatin la’o kuidadu.
Entretantu, molok ne’e, Iha sorin seluk Prezidente Autoridade Protesaun Sivil Ismael Babol hateten, hahu husi fulan Dezembru klaran tinan 2022 mai to'o Janeiru 2023 Autoridade Protesaun Sivil rejista ona dadus husi dezastre naturais hamutuk 361 husi territóriu nasionál, barak liu mak iha Munisípiu Ainaro hamutuk 182.
Nia dehan, atu hato'o de'it katak anunsia ona ba média katak informasaun husi autoridade Protesaun Sivil ba públiku kada segunda oras tuku 10 hakat ba Protesaun Sivil nia fatin atu up-date informasaun semanal.
Dadus husi Munisípiu sira mak Aileu familia 1, Ainaru 182, Ataúru 2, Baukau 1, Bobonaru 38, Kovalima 1, Dili 23, Ermera 1, Lautém 35, Likisa 6, Manatutu 2, Manufahi 19, RAEOA 38, Vikeke 12 totál hamutuk mak 361.
"Maibé atu hato'o de'it iha oportunidade ida ne'e ita rejistu situasaun akurensia dezastre naturais iha 28 Dezembru to'o mai horisehik ita rejistu asidente dezastre naturais ne'e 361 iha territóriu nasionál iha Munisípiu sira hotu iha territóriu tomak inklui RAEOA, ita bele dehan barak liu iha ne'e mak Munisípiu Ainaro mak 182 akontese durante semana rua fim Dezembru inisiu Janeiru estragus husi anin boot aibu uma," dehan nia hafoin hasoru Primeiru Ministru iha Palásiu Governu, Kinta (12/01).
