Diretór Jeral MSSI Florencio Pina Dias Gonzaga, hatete, tuir dekretu lei 22/2021, 10 Novembru katak, programa Bolsa da Mãe-Jerasaun Foun sei implementa tan ba iha munisipiu haat.

“Tinan ida ne’e, ita sei implementa programa Bolsa da Mãe -Jerasaun Foun ba munisipiu haat, tuir dekretu lei hatete,”dehan nia ba Online INDEPENDENTE, iha knar fatin, MSSI, Kaikoli, tersa (24/01).

Nia hatutan, atu implementa programa ne’e ba dahuluk, MSSI sei halo rekrutamentu ba teknik sira ne'ebé atu halo levantamentus ba dadus BdM-JF iha postu no sentru saude ne'ebé identifikadu iha Munisipiu.

Nia dehan, tuir oráriu, rekrutamentu ba tékniku sira la'o ona no remata ona iha loron 24 fulan-Janeiru 2023.

Tan ne’e, iha faze tuir mai, MSSI sei prepara formasaun ba sira no iha fulan-Fevereiru nia laran hahú ona lansamentu  ba programa refere.

Entretantu, molok ne’e governu liu MSSI implementa ona programa BdM-JF ba Munisipiu tolu hanesan, Ainaro, Bobonaro no RAEOA.

Enkuantu, hahú iha fulan-Juñu to’o Dezembru 2022, MSSI liu husi Ajensia TPY no BNCTL halo pagamentu ba benifisiariu hamutuk 37.772.

Orsamentu ne’ebé selu ona ba benifisiariu hirak ne’e mak hamutuk dolar amerikanu $905,560.