Ministru Prezidensial Konsellu Ministru, Fidelis Leite Magalhães, hatete, diploma ida ne'e ho objetivu atu halo kriasaun apoiu sira ne'ebé atribui husi estadu ba individu no familia sira iha situasaun esterma vulnerabilidade sosial, hodi garante satisfasaun ba nesesidade bázika durante prosesu reinsersaun sosiál nian.
Apoiu ida ne'e sei atribui, pontualmente ba individu no familia sira ne'ebé hasoru situasaun esterma vulnerabilidade temporáriu, ho forma hanesan béns alimentár, béns naun alimentár sira husi nesesidade báziku ba uza pesoal, béns husi nesesidade báziku ba uzo doméstiku, apoiu pekuniáriu no apoiu psikososiál.
"Dekretu lei ne'e atu fó hanoin de'it katak, durante ne'e governu fó hela apoiu ba fámilia vulneravél sira, maibé seidauk iha dekretu lei ida, diploma ida ne'ebé mak hatuur hotu hirak ne'ebé hanaran vuneravél iha dekretu lei ne'e," dehan nia iha Palasiu Governu, kuarta ne’e (25/01).
Governante ne’e hatutan, ho produsaun dekretu lei ida ne'e, atu ajuda klarifikasaun ne'ebé klaru ba hirak ne'ebé vuneravél, nune'e bainhira governu fó apoiu karik ba duni ida ne'ebé merese ka hirak ne'ebé iha duni direitu atu hetan.
"Ho dekretu lei ida ne'e ita regulariza fó apoiu ba hirak ne'ebé hetan dezastre, hirak ne'ebé sai vítima ba violensia domestika no presiza apoiu husi estadu. Aleinde, ba sidadaun sira ne'ebé presiza lori mate-isin tanba iha situasaun balun fámilia la iha kbiit hodi haloot mate-isin, governu fó apóiu," nia deklara.
Ministru afirma, ida ne'e la’ós foun, tanba governu, durante ne’e mós fó apoiu ba Timoroan sira ne'ebé mate iha rai-liur. Maibé kazu ne'e, laos ba ema hotu, la'os ema hotu iha direitu atu hetan, iha kazu balun mak MSSI presiza ho levantamentu verifikasaun katak ema ne'e presiza duni mak MSSI hafoin bele fó apóiu.
Entretantu, tipu apoiu públika ne'ebé atribui ho ninia montante depende ba avaliasaun husi situasaun vulnerabilidade sosial no husi profisional departamentu governamental ne’ebé responsavel husi asistensia sosiál nian.
Enkuantu, montante ba apoiu pekuniáriu ne'e labele liu husi dolar amerikanu $500, exetu iha situadaun sira iha transladasaun ba mate-isin sira ho montante másimu ne'ebé fiksa ona ho dolar amerikanu $5.000.
