Tan ne’e KM deside hodi extende tan to’o iha loron 30 fulan-Maiu tinan ne’e.

Ne’ebé estabelese ona iha husi Dekretu-lei nu.10/2022, loron 4 fulan-Marsu, ne'ebé aprova medida sira atu haforsa distribuisaun sesta bázika ba familia timoroan sira ne'ebé presiza no apoiu ba operador ekonómiku lokál sira no kria rejime espesial ida aprovizionamentu, iha ámbitu planu rekuperasaun ekonómiku nian.

“Ho aprovasaun ba diploma ida ne'e, prazu distribuisaun sesta bázika, ne'ebé molok ne'e define ona to'o loron 31 fulan-Dezembru tinan 2022, sei hanurak tan to'o loron 30 fulan- Maiu tinan 2023,”dehan Ministru Prezidensial Konsellu Ministru, Fidelis Leite Magalhães, iha Palasiu Governu, kuarta (25/01).

Governante ne’e dehan, altersaun ida ne'e atu fasilita ezekusaun sesta bázika ba hirak ne'ebé seidauk hetan.

Entretantu, molok ne’e, Ministru Turizmu Komersiu no Industria, José Lucas do Carmo da Silva hatete, liña Ministeriu hodi deside ona atu lori ba KM hodi prolonga loron implementasaun sesta bázika.

Nia haktuir, liña ministeriu ne'ebé deside hodi prolonga tan programa sesta bázika mak hanesan, MTKI, SEKOOP, MF no MAKE.

Nia dehan, husi parte MTKI nian foin atinji 60% no SEKooP nia atinji 80% hodi bele finaliza restu ne'ebé seidauk simu.

Kona-ba reklamasaun, nia dehan bele antisipa iha loron prolongasaun nian, maibé la'os fahe iha loron ne'e kedas mais sei hare fali konkursu ba kompaña atu bele fahe.

"Entidade distribuidór tenke hatama fali dadus ba MKAE atu verifika lai mak foin fahe reklamasaun nian," tenik nia.

Entertantu parte MKTI nian, kompaña 59 mak hetan ona pagamentu no 35 husi mak oras ne'e sei kontinua distribui no husi Sekoop 60% restu sei iha prosesu distribuisaun.