Prezidente Asosiasaun tane konsumidor, Antonio Ramos da Silva hatete, bainhira Governu disidi hasa’e impostu ba sasan seletivu sira hanesan, bebidas, kareta, tabaku no mós masin midar, Tane Konsumidor halo kedan intervensaun hodi buka hatene impaktu loloos husi hasa’e folin sasan liu-liu ba masin midar ne’ebé fó impaktu ba fatór saláriu mínimu no taxa dezempregu iha rai laran.
“Métodu análiza ne’ebé Asosiasaun Tane Konsumidór foti mak hili produtu hamutuk hitu (7) hanesan, gorengan, bebidas refresgante sira (Es-Teh, Juice), dosi kukus, bolus, boliñu no sobre meza ne’ebé nia baze ne’e mai husi masin midar,”dehan nia iha Konferensia Imprensa, iha knar fatin, Vila Verde, Kinta ne’e (26/01).
Nia dehan, estabelesimentu sira ne’ebé Asosiasaun Tane Konsumidór foti mak hanesan, Comoro (Rotunda Nicolao Lobato), Bebora, restaurante Marko Top (Vila-Verde), Paramitha Backry (Akadiru-Hun), W-Four (Hudi-Laran) nomós Amy Backry (Kolmera).
Entretantu, Prezidente ne’e esplika, Es Teh ne’ebé faan iha iha warung Marko Top Vila-Verde, uluk faan ho folin dolar amarikanu $0,25 centavus maibé agora sa’e ba $0,50 centavus.
Ba dosi kukus ne’ebé faan iha Amy Backry Colmera, uluk faan ho folin $0,25 maibé agora sa’e ba $0,35 centavus.
Prezidente ne’e haktuir, ida ne’e fó impaktu ba komsumidor sira ne’ebé ho salariu minimu no fó implikasaun direita ba poder de kompra. Tanba taxa dezempregu mós aas iha Timor-Leste ba populasaun barak liu ho idade 18 to’o 40 mak la iha servisu.
