Diretór Ezekutivu Lao Hamutuk, José Alves da Costa hateten, nu’udár Sosiedade Sivil nia sujestaun ba Ministeriu Saude tenki sosa ai-moruk dengue nian ho kualidade, tanba moras dengue sempre rejistu a’as liu iha Sentru Saúde no Postu Saúde sira.
“MS mós tenke halo konsiensializasaun ba komunidade atu hatoman an hodi soe foer tuir nia fatin, tanba susuk dengue mai husi foer ne’ebé namkari iha Dili laran,” nia hateten iha knaar fatin, Kinta (13/04/2023).
Moras dengue ne’e la’ós reponsabilidade ba Ministériu Saúde de’it, maibé ema hotu nia responsabilidade oinsa komunidade halo limpeza rasik iha sira nia uma sori-sorin, Ministeriu Saude nia papel maka halo fumigasaun bainhira dekteta kazu ruma.
Husu mós ba inan sira, kuandu iha sintoma ba moras dengue tenki hakbesik an ba iha fasilidade saude tanba dengue ne’e bele halo ema mate.
Iha parte seluk, Diretora Ezekutiva Hospitál Referal Maubise, Gabriela da Conceição Magno Pereira esplika, Hospitál Referal Maubise hahu iha fulan Janeiru to’o mai Marsu 2023 rejista kazu dengue hamutuk ema na’in 10.
