Ministra Saúde Elia dos Reis Amaral hatete, Ministeriu saúde kontinua hala’o esforsu boot hodi re-organiza no inova sistema servisu nasional iha saúde ho objetivu atu mellora diak liu tan servsiu ho kualidade ba populasaun, hodi hasa’e seguransa no asistensia saúde ba komunidade liuliu ba sira ne’ebé hela iha área rurais.
“Ita presiza hakbesik asistensia saúde to’o iha ne’ebá, tan ne’e atan ha’u hakarak aproveita prezensa husi diretores no kargu xefia sira, departamentu hotu ne’ebé marka prezensa iha fatin ne’e, atu hatete katak bainhira ita simu knar iha responsabilidade nia laran, ita iha objetivu ida sai nu’udar servidór ne’ebé di’ak ba ita nia maluk sira ne’ebé presiza ita hanesan lider,” dehan Ministra iha ambitu entrega termo servisu ba Diretores no kargu Xefia sira iha Palasiu das Cinzas Kaikoli, Tersa (15/07).
Ministra Saúde hatutan, instituisaun saúde, atu la’o di’ak tenki iha jestór ida ne’ebé di’ak no kualidade, tanba ne’e jestór sira tenki iha mós kapasidade no brani foti desizaun no mós dezeña programa hodi bele fó asistensia di’ak liu ba povu no pasiente sira.
Iha Biban ne’e, Ministra Saúde husu ba kargu dirijente sira ne’ebé hetan ona pose atu kontinua hatur dedikasaun iha servisu fatin no tenke fó apoiu malu.
