Diretór Eskola 05 De Maiu Bekora, Casmiro Dias Masques hateten, estudante finalista iha Eskola Sekundariu Jerál 05 de maio hamutuk na’in 498, maibé husi dadus ne’e, estudante na’in 493 mak tuir ezame nasional no na’in lima seluk la tuir ezame, tanba dokumentus komprovativu la iha.

“Na’in lima ne’ebé la tuir ezame nasionál, tanba la tama iha kriteriu, e dokumentu komprovativu la iha, CT na’in ida CSH na’in haat  entaun na’in lima,” dehan Diretór ba Jornalista INDEPENDENTE iha nia knaar fatin ESJ Bekora, Segunda (14/10). 

Dirijente eskola ne’e hatutan, ba kanddatu sira ne’ebé atu tuir exame nasional, durante ne’e eskola fó ona avizu ba sira atu hatama dokumentus, maibé estudantes hirak ne’e seidauk hatama dokumentus. Nune’e estudante hirak ne’e to’o agora eskola seidauk hatene sira nia paradeiru.

Nia dehan, estudante hirak ne’e, iha mós balun ne’ebé la tuir ezame iha primeriu ho segundu periodu no balun la tuir prosesu aprendezajem.

“Antes ne’e sira la hatama dokumentus iha fulan hirak nia laran, ami avizu maibé sira la marka prezensa iha ne’e, ami buka hela maibé estudante ne’e nunka tama mai, entaun ami lahatene nia dokumentus diploma iha ka ou la iha no estudante sira ne’e mos la tuir aula durante ne’e,” katak Diretór.

Enkuantu, estudante finalista iha eskola sekundaria jeral 05 de maiu bekora hamutuk na’in 498 kompostu husi Siensia Teknolojia na’in 241 no Siensia Sosiais Humanidades na’in 257.

Tuir observasaun Online independente nian iha terenu nota katak, husi númeru estudante finalista ne’ebé iha, kada sala de aula akumula estudante na’in 40 ne’ebé kompostu husi Siensia Teknolojia na’in 20 no Siensia Sosiais Humanidades na’in 20.