Inisiativa harii Kooperativa Boa Vontade Multi-Sektorial mai husi Timoroan lubuk ida nia hakarak no prinsípiu ne'ebé nakonu ho vontade ho espíritu ida de'it katak "Ita mak muda ita nia moris" Liu husi servisu hamutuk tuir prinsípiu no valores no komunga ho vizaun ne'ebé klaru tuir prinsípiu kulturál no valór umanu Timoroan nian.

Inisiadór Kooperativa Boa Vontade, Sabino Rua hatete, razaun harii koperativa ne’e, tanba konstituisaun RDTL fó biban ba sidadaun Timoroan atu tau hanoin no ideia hamutuk oinsa atu dinamiza ekonomia iha Timor-Leste.

Tanba, iha konstituisaun iha pilar tolu katak autór ba ekonomia mak setór públiku, privada no kooperativa.

“Enkontru ne’e hanesan, enkontru inisiu ida ho membru kooperativa ne'ebé ita hanaran Boa Vontade, atu nune'e akumula ideias no fahe esperiénsia no tau hanoin hamutuk atu bele ba rejistu ita nia kooperativa ne'e iha Sekretaria Estadu Kooperativa no Diresaun Nasionál Rejistu Notariadu, tanba ida ne'e hanesan rekezitus ida ne'ebé instituisaun rua ne'e fó bá ita,” dehan Inisiadór iha Edifisu Asosiasaun HONESTU DELTA I, Sábadu (12/10).

Sabinu Rua hatutan, inisiativa harii kooperativa ne'e, atu diversifika ekonomia rai laran liu husi atividade oioin ne'ebé ho lukrutiva.

Iha biban ne'e, Inisiadór ne'e mós husu ba Timoroan ne'ebé iha vontade atu sai membru,  Kooperativa Boa Vontade la taka dalan no nakloke ba ema hotu.