MS Inaugura Sentru Onkolojia Iha HNGV Featured

By Adelaide dos Santos Maiu 31, 2023 326
Ministra Saúde, Odete Maria Freitas Belo ho mediku sira haree hela fasilidade iha Sentru Onkolojia Iha HNGV, ne'ebé hetan ona inaugurasaun, iha loron 30 maio 2023. Foto:Media MS. Ministra Saúde, Odete Maria Freitas Belo ho mediku sira haree hela fasilidade iha Sentru Onkolojia Iha HNGV, ne'ebé hetan ona inaugurasaun, iha loron 30 maio 2023. Foto:Media MS.

DILI: Ministériu Saúde  (MS) halo  inaugurasaun ba sentru onkolojia iha Hospital Nasional Guido Valadares (HNGV).

Ministra Saúde, Odete Maria Freitas Belo hateten, total pasiente ne'ebe sofre moras kankru kontinua aumenta ba bebeik no numeru pasiente ne'ebe hala’o transferensia ba rai liur tanba moras kankru, tinan kotuk aumenta liu ho moras sira seluk.

Ho ida-ne'e, MS halo inaugurasaun ba unidade onkolojia iha HNGV ho Objetivu  atu halo tratamentu ba moras kankru.

“Hanesan Hospital top referral Ministeriu Saude iha responsabilidade bo'ot tebes hodi apoia HNGV, atu kria kondisaun relativa ho rekursu umanu, material no ekipamentu, inklui medikamentu no konsumiveis mediku hodi bele halo diagnostiku ne'ebe diak no halo asistansia medika ba pasiente sira ne'ebe sofre moras kankru,” nia hateten iha HNGV, Tersa (30/05/2023).

Ho ida ne'e, sira orgullu tebes tanba fasilidade ida ne'ebe dedika espesialmente ba onkolojia iha HNGV, tanba sira iha ona espesialista timoroan ne'ebe hamutuk ho espesialista husi Brigada Medica Cubana bela tau matan ba pasiente sira ne'ebe presiza asistensia medika iha area onkolojia nian.

Aleinde ida ne'e, sira mos kontinua buka meius hodi koopera ho fasilidade onkolojia iha rejiaun,  hodi hadia kapasidade resposta ba moras refere.

MS husu nafatin ba HNGV hodi kontinua halo esforsu, atu nune'e dezenvolse servisu onkolojia iha HNGV no ajuda INSP-TI iha drea Investigasaun no peskiza liga ho situasaun moras onkolojika iha Timor-Leste, atu sai evidensia ba MS hodi estabelese programa Nasional ba prevensaun no kontrolu moras kankru iha Timor-Leste.

Iha fatin hanesan, Diretor Klinika HNGV, Alito Soares informa katak, HNGV iha ona sentru onkolojia atu halo tratamentu ba moras kankru sira iha rai-laran.

“Ita iha ona sentru onkolojia ne'ebe liga kedas ho ita-nia kazu transferensia ne'ebe mak durante ne'e halo tratementu iha rai liur. Ho ida ne'e ho inaugurasaun sentru Ida ne'e garantia katak, bele halo tratamentu fila fali iha rai laran atu reduz kustu sira ne'ebe mak durante ne'e iha," nia dehan.

Entretantu, Xefe Unidade Onkolojia iha HNGV, João Teodoro Amaral afirma,  moras kankru durante ne'e sai preokupasaan bo'ot ba MS, tanba ne'e HNGV tau kustu transferensia ne'ebe mak bo'ot tebes hodi hari'i sentru refere.

Rate this item
(0 votes)
Last modified on Kuarta, 31 Maiu 2023 14:28

Independente Digital TV