Razaun PN Leilaun Karreta Estadu: Bengkel Explora Estadu Featured

By Mariano Mendonca Maiu 31, 2023 459
Prezidente Parlamentu Nasionál, Aniceto Guterres. Foto:Dok/INDEPENDENTE. Prezidente Parlamentu Nasionál, Aniceto Guterres. Foto:Dok/INDEPENDENTE.

DILI: Prezidente Parlamentu Nasionál, Aniceto Guterres, fó sai razaun Parlamentu Nasionál hodi deside halo leilaun ba karreta estadu. Tuir Aniceto leilaun ne’e halo atu ‘evita’ ofisina ka bengkel explora estadu.

Tuir Aniceto, PN hakarak halo leilaun ba karreta Parlamentu nian atu hamenus despezas estadu nian.

"Se leilaun ne'e problema saida? Ha'u horibainhira adianta tiha ona uma forma jestaun patrimoniu estadu. Se uza karreta tuan halo despeza estadu ne'e boot liu tan entaun ne'e mak ema dehan jestaun ne'e, se sosa karreta foun di'ak liu duke uza karreta tuan halo despeza boot, estadu rugi hela de'it.”

"Despezas boot halo rugi ita, entaun ita tenke putar otak, buat ne'e hanesan buat simples, mais ne'e iha mundu hotu-hotu halo, ita Timor ne'e mak saida, parese ita hakarak bisnis ho bengkel sira ne'e par atu fó haan bengkel sira ne'e, par bengkel sira explora estadu," dehan Aniceto hafoin audensia ho Primeiru Ministru, iha Parlamentu Nasionál, Tersa (30/05).

Nia hatutan, duke husik hela karreta tuan ne’ebé dodook ona, hadia mós la di’ak, no ho gastus boot liu sosa karreta foun, di’ak liu leilaun.

"Entaun husu se sosa karreta foun mak di'ak liu, halo tiha ona alinasaun, maibé lejislatura ida ne'e dala ida tan ha'u hatete, lejislatura ida ne'e la ko'alia kona-ba atu sosa karreta foun, orsida lejislatura foun mai mak sira mak deside atu sosa ka la sosa karreta foun, atu sosa hira ne'e problema sira nian, agora ha'u nu'udar Prezidente Parlamentu ba kinta lejislatura ida ne'e ha'u tenke halo jestaun," katak nia.

Nia hatutan, nia tenke halo jestaun ba patrimóniu estadu nian tanba lejislatura ida ne'e lakohi husik buat todan ba lejislatura foun mai, liu-liu kona-ba despezas estadu.

Durante mandate kinta lejislatura, nia hatutan, tenta halo reforma atu hamenus despezas estadu iha Parlamentu nian.

"Orsamentu tinan-tinan Parlamentu nian antes ne'e aas loos mais iha ha'u-nia tempu ne'e komesa hatun, no forma sira balun atu hatun ne'e mak id ne'e, ida mak leilaun," katak nia.

Prezidente PN ne’e mós kestiona públiku ne’ebé la koalia kona-ba karreta terseira lejislatura ne’ebé to’o ohin seidauk intrega ba PN.

"Terseira lejislatura ne'e problema karreta 35 iha hela eis Deputadu sira ne'ebé iha terseira lejislatura nian la re-eleitu, karreta agora iha hela sira, karreta to'o agora estadu la dada, iha ne'e 30 de'it. Agora restu ida iha deputadu nian liman ne'e imi la ko'alia, imi ko'alia de'it mak ida aat dodok, uza ba uza ba serbisu estadu nian durante tinan lima ba neen ona."

Hatan kona-ba tanba sa la husik ba lejislatura foun mai mak halo leilaun no sosa foun?, nia hatan, se lejislatura ida ne'e bele halo, nusa mak labele, tanba prosesu hahú tiha ona dezde tinan kotuk la'os foin mak hahú.

"Agora tanba eleisaun ne'e mak ami seidauk book ne'e, eleisaun hotu ami tenke rezolve ida ne'e," nia fó razaun.

Tuir nia, leilaun ba karreta PN nian sei la’o tuir lei no regras leilaun ne’ebé iha.

"Sei la'o tuir lei no regras, sei la halo hanesan uluk, sai tiha problema to'o ohin loron mós sai tan problema, ha'u mak lori todan, agora ne'e sei la'o tuir lei, lei dehan saida ami sei la'o tuir lei," nia hatete.

Aniceto informa, iha Tersa, horseik, ekipa husi Patrimoniu Estadu halo ona inspesaun ba karreta nia kondisaun hodi determina loloos karreta ne'e ninia presu no nia idade.

Molok ne’e, Diretór Ezekutivu Asia Justice And Rights (AJAR), José Luís de Oliveira hatete, Parlamentu Nasionál atu lelaun ba karreta terseira lejistura ne'e atu kanten no naok-teen.

"Lamenta deputadu sira ninia atetude ne'e hanesan loos sira naok-teen sira ne'e, atu mandatu hotu ona buka karreta estadu, la preokupa katak estadu ninia kapasidade finanseiru ne'e iha hela risku nia laran," dehan José Luis via telefone, Sesta (26/05).

Tanba, nia hatete, Timor Leste iha depedensia boot ba fundu minarai no fundu minarai komesa menus, reseita alternativu laiha, no deputadu sira foti tan patrimóniu estadu.

Tuir nia, loloos PN entrega karreta ba jestaun patrimóniu estadu laos PN mak lelaun rasik.

“Bainhira sira lelaun rasik ne'e viola lei ne'ebé regula kona-ba alinasaun ba patrimóniu estadu, tanba ne'e karreta estadu sosa ho osan povu nian, tenke submete ba rejime ne'ebé regula kona-ba oinsá atu halo alinasaun ba patrimóniu estadu, la'ós sira mak deside rasik, se karik sira sosa ho sira-nia osan rasik, ne'e laiha buat ida, ne'e sosa ho osan povu nian,” katak nia.

Rate this item
(0 votes)
Last modified on Kuarta, 31 Maiu 2023 14:36

Independente Digital TV