Kauza husi servisu kompañia ne’e nian, iha Domingu (26/3), bainhira udan tuun sobu konstrusaun barrajen no populasaun sira nia hela fatin iha Aldeia Lesbutar, Suku Suku Komoro.

“Ita tenke haree, tanba saida moru protesaun ne’ebé ita halo udan boot mai sobu hotu”, dehan Ministru Obras Públika Transporte no Komunikasaun (MOPTK), Gastão Sousa, iha Palasiu Governu, horisehik.

Tuir nia, impaktu husi kompañia monta mákina iha mota Beduku hodi suru rai-henek mak hamosu inundasaun. Ne’e duni, presiza investiga no buka tuir kompañia ne’e hetan autorizasaun hodi instala materiál konstrusaun iha fatin ne’e ka lae.

Gastão dehan kazu ne’e ANP nia responsabilidade, maibé presiza atu husu sira kona-ba kompañia ne’e hetan duni lisensa ka lae. Tanba, suru rai henek bele fó iha impaktu ba ambientál ne’ebé afeta buat barak.

“Ita tenke haree didi’ak antes ita haruka para ka oinsá,” tenik nia.

Antes ne’e, iha Domingu (26/3), bainhira udan boot iha área Dili, mota husi Beduku nian tuun mai hodi estraga barrajen, estrada no populasaun sira nia hela fatin.

Ne’e duni, autoridade lokál no komunidade sira iha fatin ne’e husu atu Governu bele toma medida ba kompañia sira ne’ebé suru rai-henek iha fatin ne’e.