Deklarasaun ministru Salvador ne’e relasiona ho ideia husi povu Laleia ne’ebé Xanana Gusmão reforsa, atu hanaran ponte Laleia ho ponte Don Martinho Lopes.
“Naran ponte seidauk formaliza, banhira aprovadu publika iha jornal republika entaun ofisiál naran hanesan ne’e, sei iha anulasaun mai fali Konsellu Ministru sei vigora banhira publika ona iha jornal republika,” informa ministru Salvador iha palasiu governu, Kuarta (02/09).
Kona-ba sujestaun husi povu Laleia no Xanana, Salvador dehan, to’o oras ne’e nia parte seidauk simu informasaun formal ruma, no kestaun ne’e liga ba kompetensia Primeiru Ministru Taur Matan Ruak.
“Ida ne’e kabe ba primeiru ministru mak atu haree, tanba ohin Konsellu Ministru seidauk check ida ne’e, desizaun no proposta husi eis Prezidente Republika José Ramos Horta mai iha Primeiru Ministru, hato’o ba ministru obras publikas atu nomeia ponte tolu ou haat, ida tau naran eis prezidente South Africa ninian,” Ministru informa.
Kona-ba karik iha posibilidade atu simu rekomendasaun husi povu Laleia no Xanana hodi tau fali naran Don Martinho ba ponte Laleia, ministru ne’e hatan, ne’e depende desizaunn tomak governu nian.
Molok ne’e, Lider nasional no atual Prezidente Partidu CNRT, Kay Rala Xanana Gusmão la konkorda ho ideia husi Ramos Horta no desizaun ne’ebé governu foti ona hodi hanaran ponte Laleia ba ponte Nelson Mandela. Xanana hakarak atu ponte ne’e hanaran ponte Don Martinho Lopes.
Xanana dehan, nia la aseita ho desizaun governu hodi naran ponte Laleia ho ponte Nelson Mandela, tanba mota Laleia no povu Laleia mós iha eroi boot ida, hanesan saudozu Don Martinho Lopes.
“Ha’u triste tebes, sai problema boot, ha’u rona katak sira (Governu) fó naran ponte Nelson Mandela. Ha’u sente triste tebes, tanba Laleia oan ida, Bispu Don Martinho Lopes, iha papel boot ida halo negosiasaun ho Indonézia to’o konsulta popular 30 Agostu 1999.”
“Don Martinho iha papél importante tebe-tebes iha funu. Tanba depois fulan Marsu 1981, atu reorganiza fali Frente Armanda no Rezistensia laiha dalan atu haruka dokumentu konfrensia Laline nian ba li’ur. Susar tebtebes, laiha duni komunikasaun, ho radio mós laiha. Tanba Alarico Fernandes operasaun Sky Light halo forsa barak rende tiha no imimigu kaptura forsa lubuk ida, no ita lakon ligasaun iha li’ur. Ikus mai ha’u hasoru malu ho Don Martinho iha Mehara, Lospalos, ho Kopasus mak fó seguransa iha Saudozu Raja Miguel nia uma hodi ha’u bele entrega dokumentu Laline kona-ba reorganizasaun funu nian ba Don Martinho hodi konsege ba fó ba li’ur hodi hatene katak, funu FALINTIL no povu sei kontinua eziste,” dehan Xanana ba jornalista sira halo observa direitamente Ponte Laleia iha Postu Administrativu Laleia, Munisipiu Manatutu, Segunda (31/08).
