CNRT ne’ebé ninia lideransa nia fotografia grupu RNDJ-KRDTL uza la ‘preokupa’, tanba konsidera Xanana la’os de’it Prezidente CNRT maibé mós nu’udar patrimoniu estadu nian no Timor-oan hotu iha direitu atu uza ninia fotografia.

Vise Xefe Bankada CNRT, Patrocínio dos Reis Fernandes hatete, laiha lei ida ne’ebé bandu Timor-oan ida uza Xanana nia fotografia ba ninia atividade ruma.

“Atu dehan dala ida tán katak partidu CNRT laiha koñesimentu kona-ba atividade sira ne’ebé mak Angela Freitas halo. Maibé iha konstitusaun ne’ebé fó liberdade ba ema hotu atu espresa sira ninia hanoin,” dehan deputadu CNRT ne’e.

Ba fotografia Xanana ne’ebé grupu RNDJ-KRDTL uza, portavoz grupu, Angela Freitas hatete, sira la hetan autorizasaun husi Xanana atu tau ninia fotografia.

“Ami tau fotografia iha background press konferénsia ne’e laos dehan Xanana autoriza ka la autoriza, maibé ami hanesan sidadaun tomak deside tau figura hanesan mahon ida no ami respeita hanesan agora ami defende konstituisaun RDTL,” dehan Angela ba jornalista sira iha sede nasional RNDJ-KRDTL, Bairo Formoza, Dili (02/09).

Nia hatutan, RNDJ-KRDTL uza fotografia Xanana tanba konsidara Xanana nu’udar figura mudial no aman ba povu no nasaun Timor-Leste no laos ho intensaun ba iha manifestasaun.

“Ami tau Xanana nia foto tanba nia hanesan lider ida no (eis) komandante xefe FALINTIL no hanesan aman ida ba nasaun ne’e no mundialmente, tanba ne’e ami tau, la’os relasiona ho buat ne’ebé ami halo,” Angela hatete.