“Importante mak MOP hatene hodi haruka tekniku sira ba resolve. Ezemplu hanesan estrada aat iha Munisipiu Aileu hahú husi Remexio Vila ba to’o iha kruzamentu Suku Faturasa no mós estrada nasional sira, dadauk ne’e MOP halo hela atendementu,”dehan nia hafoin partisipa debate OJE 2023, iha Parlamentu Nasional, tersa ne’e (08/11).
Governante ne’e hatutan, ba estrada sira ne’ebé aat, foin dadauk Konsellu Ministru mós aprova projetu proposta ida husi MOP ba tenderizasaun ba konstrusaun estrada hanesan, Manatutu ba Laklo, Aileu, Dili, Bobonaru no Baukau, parte Kelikai ho Baguia, no Lautem parte Laivai nian.
Entretantu, molok ne’e, Konsellu Ministrus aprova proposta ne'e tuir projetu ne’ebé aprezenta husi Ministru Obras Públikas (MOP) Abel Pires da Silva, delibera ona atu fó autorizasaun ba prosedimentu aprovizionamentu ho tipu Konkursu Públiku Internasionál no ba ninia despeza plurianuál ba obra públika projetu konstrusaun ponte foun ho estrutura metálika Mota Komoro Ulun (Kasnafar).
"Konsellu Ministru mós aprova proposta ne'ebé aprezenta husi Ministru Obras Públiku kona-ba autorizasaun ba prosedimetu aprovizionamentu ho tipu Konkursu Públiku internasionál no nia despeza ba plurianual ba Obra Públika projetu konstrusaun ba ponte foun ho estrutura metalika ka estrutura besi iha mota komoto ulun Kasnafar, ita boot sira hotu mós akopaña," dehan Ministru Prezidensia Konsellu Ministru (MPKM) Fidelis Manuel Leite Magalhaes hafoin reuniaun KM hotu iha Palásiu Governu, Sesta (04/11).
Nia dehan, mota ne'e tinan hirak liu ba lori ema no mota ne'e tinan-tinan kontinua sai hanesan inpedimentu ida ba transporta Públiku entre nasionál Dili ho Munisípiu sira, liu-liu Munisípiu hirak ne'ebé hanesan Aileu, Ainaru, Manufahi no Kovalima.
Tan ne'e mak Governu deside atu avansa ho konstrusaun ba ponte ida ne'e, no ponte ne'e rasik sei halo hotu ho besi, nune'e bele garantia tempu udan labele afeita ba movimentu Públiku, tanba estrada liga nasionál Dili entre Munisípiu sira.
Orsamentu ne'ebé prevee ba projetu ida ne'e ho ninia montante totál U$ 8.9 milloens hodi halo konstrusaun ba ponte ne'e rasik, tanba dala barak mota ne'e sempre fó impaktu iha tempu udan.
Enkuantu, iha 19 Outubru 2022 Ministru Obras Públikas (MOP), Abel Pires da Silva, asina ona kontratu ho kompañia manán na’in sira kona-ba projetu konstrusaun ba moru protesaun mota husi Manlauanna to’o mota Kasnafar ne’ebé hetan estragus iha kalamidade 4 Abril 2021, no projetu tau aspalt ba estrada husi Fatisi (bee tudak) nian ba to’o Sarlala ne’ebé daudauk ne’e hahú ona prosesu konstrusaun.
