"Atu hatete progresu implementasaun to'o ohin loron ita bele koalia katak, suku hamutuk 11 mak dada ona eletrisidade no estimasaun ne'ebé iha, to'o fulan Dezembru sei dada tan liña eletrisidade ba suku 15, tanba ne'e to'o fulan Dezembru ita konklui ona purvolta 94%, husi suku hotu iha Timor laran tomak,” dehan nia liu husi plenaria iha debate ba Proposta Lei OJE 2023 iha Parlamentu Nasional, tersa (08/11/).
Nia dehan, restu husi 6% ne'ebé seidauk asesu ba liña eletrisidade, EDTL sei halo instalasaun.
Nia dehan, iha fulan kotuk ministeriu promove ona pakote projeitu hamutuk 117, ne'e kobre hotu suku sira ne'ebé seidauk asesu eletrisidade.
Entretantu, Deputadu opozisaun husi Bankada CNRT, Maria Fernanda Lay hatete, governasaun anterior antes ne'e konsege dada liña eletrisidade ba komunidade sira atinji ona 80%.
Nia dehan, maibe iha mandatu Oitavu Governu Konstitusional seidauk konsege rezolve hotu suku sira ne’ebé seidauk asesu ba eletrisidade.
Enkuantu, molok ne’e, Prezidente Konsellu Administrasaun EDTL,EP, Paulo da Silva, hatete, progressu ne'ebé EDTL-EP halo ona mak kobertura asesu enerjia eletrika programa eletrifikasaun nasionál, liu-liu ba suku sira ne'ebé seidauk asesu enerjia eletrika.
Entaun, EDTL-EP halo programa ida ne'e fahe ba faze tolu, faze dahuluk 44 projetu kobre 24 suku, faze daruak 34 projetu ho 17 suku no faze datoluk 36 projetu kobre 23 suku ne'ebé implementa. Faze dahuluk projetu la'o iha suku 6 mak konklui 100%, ona no balun la'o hela, no tuir tarjetu sei konklui iha fulan ida ne'e.
Faze daruak mós tama ona iha implementasaun, kompañia hahú konstrusaun iha terenu, faze datoluk agora tama ona faze finalizasaun, avaliasaun tékniku finsiál, ne'ebé la kleur asina kontratu ho kompañia sira, atu sira implementa iha suku tolu ne'ebé seidauk lansa tenderizasaun, nune'e semana oin lansa ona iha suku Fatukalu Same, Fatumakerek Manatutu, Fatumea Suai.
Progressu seluk mak EDTL-EP halo ona instalasaun kontadores ba populasaun sira iha tinan 2021, EDTL-EP sosa kontador hamutuk 108 mill prepagu, ne'ebé instala hahú kedas fulan Outubru mai fulan Setembru tinan 2022 instala ona kontador hamutuk 76 mill Timor laran tomak.
Husi instalasaun kontadores konsege hasa'e reseita, tanba uluk sei iha diresaun jerál rata-rata kompleta de'it millaun $ 2.6 to'o 2.7 no instala kontadores, inspesaun rutina, fulan ida hetan to'o 3.6 to'o 3.7 milloens, to'o fulan Setembru tinan 2022, no hetan ona 34.4 milloens husi Janeiru mak to'o Setembru.
Enkuantu projesaun ba tinan 2022 ida ne'e sei hetan $ 40 milloens, maibé ne'e sei manetin ritmu koleksaun reseita, to'o fim du anu, bele hetan liu $ 45 milloens ba tinan 2022, entaun ne'e progresu ida ne'ebé EDTL-EP hetan bele ajuda hatama osan ba kofre estadu nune'e bele garante funsionamentu servisu eletrisidade nian.
