Ministru Obras Publikas, Samuel Marçal hatete, MOP sei aloka orsamentu hodi konstrui Mota Welolo, tanba tempu udan sempre ameasa ha movimentu komunidade sira atu asesu.

“Tinan ida-ne'e ami prevee ona orsamentu purvolta millaun $1 ba normalizasaun no konstrui mota welolo, maibé orsamentu ida-ne'e seidauk fixsa loos, tanba presiza halo levantamentu, atu hatene loos montante orsamentu ne’e,” Dehan Ministru Obras Publikas, Samuel Marçal, liu husi Komunikadu Imprensa ne'ebé INDEPENDENTE asesu iha pájina MOP, Tersa (20/02).

Ministru Samuel dehan, tanba ne'e bainhira udan para MOP hahú halo normalizasaun ba mota, maibé molok atu konstrui ponte foun, presiza halo estudu ida kle'an di'ak, tanba mota Welolo uniku.

“Ha'u haree mota ida-ne'e uniku iha Timor, tanba mota hotu-hotu nia ain bá to'o tasi, uniku mota Welolo deit mák mota ain laiha, tanba ne’e bee hala'i ba ne'ebé ita lahatene, nune'e ita presiza halo estudu ida kle’an ba mota welolo,” Nia informa.

Dadaun ne’e, ekipamentu pezadu husi empreza JONIZE unipesoál Lda destaka ona iha mota Welolo, maibé udan halo mota korrente boot ne'ebé afeta ba normalizasaun no konstrusaun.

“Ita-nia empreza la'ós la servisu, maibé mota mak sei boot, karik udan para ita-nia empreza hahú fali servisu hodi halo normalizasaun,” Nia relata.