Ministru Obras Publikas, Samuel Marçal hamutuk ho DUIVP no DPE halo observasaun ba estrada Lugatoi ne'ebé implementa husi empreza Hoven II oinsa normaliza movimentu transporte publiku iha tempu udan.
“Ohin (segunda) hau mai hamutuk ho ekipa tékniku Ministériu Obras Públika observa dalan Lugatoi atu foti desizaun, karik estrada Lugatoi labele ita tenke haree mós dalan alternativu seluk, maibé ha'u haree ona no tékniku sira dehan bele rezolve kestaun dalan Lugatoi,” Dehan Ministru Obras Publikas, Samuel Marçal liu husi komunikadu Imprensa ne'ebe INDEPENDENTE Asesu iha Pájina MOP, Tersa (20/02).
Ministru informa, orsamentu ba konstrusaun estrada Lugatoi seidauk prevee, tanba orsamentu multi anuál, katak bainhira tekniku sira haree kondisaun real mak foin bele aloka orsamentu.
Entaun ekipa MOP mós observa husi kamera drone ne'ebé haree dalan alternativu ne'ebe atu loke husi aldeia Buanurak to'o iha eskola sekundáriu 4 setembru.
Nia informa, tanba parte Xefe suku Caraubalu informa ba MOP katak dalan alternativu ne'e ba futuru sei konstrui ospitál Munisipál no edifísiu kamara Munisipal.
"Maibé ita sei haree iha tinan 2025, tanba agora ita foku ba estrada lugatoi,” Nia Informa.
Aliende ne'e, MOP mós observa estra Urbana iha Vikeke ne'ebe grave liu presiza tau atensaun, maibé husu komunidade sira atu labele impede prosesu bainhira projetu la’o.
“Ha'u mós sei ba haree direta dalan urbana sira iha kapitál Vikeke Vila, oinsa maka ita bele hadi'a, tanba kondisaun aat teb-tebes. Ha'u espera katak iha tinan ida-ne'e ita bele komesa hadi'a dalan urbana sira-ne'e,” Nia relata.
Molok ne'e, Administradór Munisipiu Vikeke, Januário Soares hatete, udan monu rai sempre ameasa boot, tanba estrada Lukatoi sempre monu.
“Estrada Lukatoi ne'e mak sempre book an, tanba foin loron hirak nia laran (kompaña Xiña ateru) mais agora horseik ha'u haree tohar tiha fali ona,” Nia informa.
Nia haktuir, Kompaña Xiña ne'ebe iha hela terenu mak sempre halo intervensaun, maibé parte ekipa IGEADI laiha hodi halo normalizasaun ba estrada Lukatoi.
Tanba nia informa, governu presiza halo prosesu foun ba estrada foun ne'ebe foin loke hodi hatun subida oituan, atu haluan tan para bele tau alkatraun ona.
