Nia sente orgullu bele halo diskusaun ho Primeiru Ministru, Kay Rala Xanana Gusmão nu’udar lider rezistensia ne’ebé iha esperiénsia klean hodi fahe ba rai laran no rai liur.
“Ami ko'alia kona-ba situasaun atual Timor-Leste nian dezenvolvimentu nasaun. Ami ko'alia ligadu ho relasaun nasaun rua nian oinsá Fransa bele apoia dezenvolvimentu Timor nian iha parte saida de'it Timor-Leste presiza,” informa Konsileiru Fransa Laurent ba jornalista, iha Palásiu Governu, Tersa (20/02).
Nia informa, Governu Fransa sei kontinua hametin kooperasaun ne’ebé rai rua estabelese durante ne’e Fransa no Timor-Leste iha pozisaun hanesan kontra funu ne’ebé akontes entre Rusia no Ukrania no Israel no Hamas.
“Ita nia Nasaun rua iha valor demokrásia ne'ebé hanesan, ami apoia sistema multi lateral iha kontestu internasionál ne'ebé dadauk ne'e hasoru hasoru problema, ezemplu mak entre Rúsia no Ukránia, mundu ne'ebé ita hela ba komplikadu tebes nune'e ita tenke hamutuk hodi hasoru. Hamutuk ho ami Fransa di'ak katak importante tebes iha parseiru hanesan Timor ne'ebé lokaliza iha área Pasífiku," nia hatete.
Nia afirma, kona-ba área espesífiku ne’ebé Fransa hakarak apoia formasaun ba funsionáriu liu-liu ba feto no diplomata Timoroan sira iha lingua Fransa nian, iha mós projetu balun ba agroekonomia, agroekologia, no sistema rekursu bee moos.
Entretantu, PM Kay Rala Xanana Gusmão, agradese tebes, tanba durante ne’e Fransa apoia mós diversifikasaun ekonómia nasaun liu husi Kompañia Fransa nian hanesan Bolloré Logistics International ne’ebé harii ninia sukuarsal iha nasaun 100 liu-liu inklui sukursal Bolloré Logistics Timor-Leste ho SDV Timor-Leste ne’ebé konstrui Portu Tibar.
