Iha 19 Fevereiru 2024, Primeiru Ministru, Kay Rala Xanana Gusmão hala’o enkontru Embaixadór Repúblika Kroasia ba Indonézia no Asosiasaun Nasaun Sudeste Aziatiku (ASEAN), Nebojsa Koharovic  hodi deskute kooperasaun bilaterál rai rua ba futuru.

Embaixadór Repúblika Kroasia, Nebojsa Koharovic informa, vizita hodi hato’o sira nia komitmentu ba futuru rai rua bele servisu hamutuk iha dezenvolvimentu ekonómiku.

Nia haktuir, Embaixadór Repúblika Kroasia ba Indonézia no Asosiasaun Nasaun Sudeste Aziatiku, hala’o servisu iha Jakarta no ninia vizita ne’e mai Timor-Leste hodi reafirma mós sira nia planu kooperasaun ba oin.

“Enkontru kontrutivu tebes, agradese hasoru malu ho Primeiru Ministru nu'udar Lider istoriku ba Timor-Leste nia independensia. Hanesan ita hotu hatene katak Kroasia gosta tebes Timor-Leste hanesan nasaun foun," dehan komunikadu ne'ebé jornalista Independente asesu husi Mídia gabimete Primeiru Ministru, (20/02).

Kroasia ho komitmentu hakarak tebes atu halo kooperasaun hodi espesifiku liu ba setór hirak ne'ebé prioridade tebes ba Timor-Leste nian.

"Ohin ami ko'alia kona-ba dezenvolvimentu no posibilidade halo kooperasaun espesifiku iha área edukasaun, saúde, industria no dezenvolvimentu projetu ekonómia,” haktuir komunikadu.

Iha enkontru ne’e, Embaixador Nebojsa Koharovic konvida mós Primeiru-Ministru Xanana atu partisipa iha simeira ka forum ekonómia ajul ne’ebé sei hala’o iha Croasia iha fulan Maiu 2024 nia laran, no eventu ne’e sei marka prezensa hosi xefe estadu, xefe governu no entidade importante sira seluk hodi hato’o sira nia hanoin.

Embaixadór Repúblika Croasia, Nebojsa Koharovic  agradese Timor-Leste hanesan nasaun foun halo esforsu makas hodi dezenvolve ekonómia no infrestrutura no rekursu umanu hodi prepara aan sai membru ASEAN no Timor-Leste mós hola parte membru CPLP, no envolve iha grupu g7+ no halo kooperasaun nasaun hotu hodi haluan ninia estratezika kooperasaun bilaterál, multi-laterál, tri-lateral.