MOKATIL Identifika Ona Rai Hektares 700 Hodi Kuda Bafo Kay Rala Featured

By Ivonia Varela Novembru 23, 2023 3039
Sekretáriu Estadu Kooperativa Arsénio Pereira da Silva ho Ekipa observa hela bata kay rala neebe kuda iha Munisipiu Aileu. Foto:Media Gabinete SEKoop. Sekretáriu Estadu Kooperativa Arsénio Pereira da Silva ho Ekipa observa hela bata kay rala neebe kuda iha Munisipiu Aileu. Foto:Media Gabinete SEKoop.

AINARO: Movimentu Kamponeze Timor-Leste (MOKATIL) prepara ona rai hektares atus hitu (700) iha teritoriu laran tomak hodi kuda Bafo Kay Rala.

Sekretáriu Estadu Kooperativa Arsénio Pereira da Silva hatete, rai hektares atus hitu ne'e grupu MOKATIL indentifika no hodi prepara ona atu kuda batar kay rala. Tan ne'e SEKoop la'o tuir hodi halo lansamentu.

“Rai ne'ebé MOKATIL prepara iha balun ne'ebé sira konsege fila no balun lere de'it tanba depende ba fatin ne'ebé iha. MOKATIL la'ós kuda bafo kay rala de'it maibé iha multi sektoral ne'ebé nia objetivu oinsa atu eleva ekonomia familia nian,”dehan nia iha Suku Soro, Postu Administrativu Ainaro, Munisipiu Ainaro.

Sekretáriu Estadu Kooperativa haktuir tan katak, MOKATIL sai mós parseiru permanente ida ba SEKoop, tan ne'e governu prepara ona, bainhira produsaun ne'e kolleta sei husu ba sentru lojístika nasionál hodi sosa, no iha tinan 2024 haré ba produsaun ne'e barak sai mós hanesan menú ida ba merenda eskolar.

Iha biban ne’e, Sekretáriu Estadu Kooperativa husu ba grupu MOKATIL iha teritoriu laran tomak atu kontinua halo atividade podusaun sira tanba merkadu primeiru mak ema nia kabun, tanba bafo kay rala bele subtitui ba fós no batar.

Iha fatin hanesan, prezidente MOKATIL Munispiu Ainaro Costantino de Araújo hatete, hanesan toos na’in halo tuir saida mak governu haruka ona, tanba banhira povu kuda ona, governu mak sei sosa.

“Hanesan toos na’in sei la ses tanba povu kuda governu sosa entaun ida ne'e dalan di’ak,” dehan nia.

Entretantu, rekorda katak, Sekretáriu Estadu Kooperativa halo ona lansamentu kuda batar kay rala iha munisipiu Lautem, Ainaro, Likisa, Aileu, Manufahi no Kovalima no mós Oekuse.

Rate this item
(0 votes)
Last modified on Kinta, 23 Novembru 2023 12:09

Independente Digital TV