Xefe Sentru Saúde Kailaku, Anina Afonso Gonsalves, preokupa Sentru Saúde Kailaku infreta karreta ambulansia bainihira atu halo transferensia pasiénte ba Ospital referal sira.
“Ami preokupa tebes (Karreta) ambulansia, atu tula pasiente la sufisiente, tanba iha sentru saude Kailaku iha kareta ambulansia ida, maibé kondisaun karreta ambulansia ne'ebé agora iha ne'e merese uza iha kondisaun estrada ne'ebé diak, entaun ita hare'e kondisaun estrada iha ami nian ne'e ladun diak, bainhira aat difikuta tebes atu tula pasiente lori mai iha ne'e ka ba Ospital Referal Maliana,” Dehan Anina, iha Sentru Saúde Kailaku, Kuarta (22/11).
Nia haktuir, Postu-administrativu Kailaku iha suku-ualu, maibé iha suku balun iha foho no kondisaun estrada mos ladun di’ak, bainhira ambulansia kuandu ba mai bebeik tula pasiente lori mai halo ambulansia aat mos lalalis.
“Karreta ambulansia ne'ebé iha halao servisu aat tiha foin lori ba halo manutensaun iha Dili, no lori fali mai, entaun bainhira ambulansia aat ba halo manutensaun difikulta tebes, tanba kuandu failla pasiente sira-ne'ebé presiza urjente,” Nia afirma.
Nia afirma, tanba atu foti mai iha sentru saúde ka refere ba Maliana, tenke komunika fali ba servisu saude munisipiu liu husi Xefi Lojistika mak orienta karreta ambulansia iha Maliana mai direita pasiente iha sentru saude Kailaku hodi lori ba Ospital Referal Maliana.
Molok ne’e, Diretór Jerál SNAEM,I.P Horacio Sarmento da Costa hatete, totál ambulansia 55 no 25 mak sei di'ak hodi halo operasaun iha territóriu nasionál.
“Ita nia númeru Ambulansia hamutuk 55. maibé ambulansia 18 mak ita entrega ona ba iha patrimoniu estadu, tanba labele halo ona manutensaun ida ne'ebé mak iha ne'e ita iha de'it Ambulansia 25 mak halo operasaun iha territóriu nasionál ho ida ne'e ita hare'e katak la sufisiente, tanba durante ne'e iha munisipiu balun iha Ambulansia ida de'it entaun ita tenke apoiu husi Dili ba hodi evakua pasiente sira mai iha Hospital Nasional,” Dehan nia, iha edifisiu SNAEM.IP, Kaikoli, Tersa (07/11).
Nia afirma, SNAEM.IP hare'e ba númeru populasaun ne'ebé mak bo'ot kada Munisípiu sira, entaun koloka ambulansia tolu, ho ida ne'e agora dadaun iha munisípiu 8 mak Ambulansia ida-idak, maibé ida ne'e la sufisiente nafatin.
