Inisiativa husi projetu peskiza ida ne’e sei kobre uma kain rihun 9 resin, hodi fasilita Governu Timor-Leste atu hetan dadus krusiál, hodi hatan ba preokupasaun nível falta seguransa ai-han.

WFP sei fornese apoiu tékniku ba governu hodi halo avaliasaun ne’ebe foka liu ba seguransa ai-han iha eskala ne’ebé boot liu hala’o iha rai laran.

Diretóra ADB iha Timor-Leste, Stefania Dina, hatete, senti kontente halo parseriu ho governu ho WFP ba servisu importante ne’e.

“Ami kontente halo parseiru ho governu ho WFP ba servisu importante ida ne’e. Timor-Leste sei hasoru nafatin problema ho nível malnutrisaun ne’ebe aas iha mundu. Importante tebes atu tau atensaun ba problema falta seguransa ai-han atu asegura katak populasaun iha asesu ba ai-han sufisiente no nutritive,”Online INDEPENDENTE sita iha komunikadu, kinta ne’e (23/11).

Ho nune’e, avaliasaun ne’e sei estabelese análize kle’an kona-ba nível falta seguransa ai-han husi populasaun iha munisípiu 14 no mos iha nível nasional.

Tuir nia, ida ne’e mós sei deside padraun konsumu ai-han ba uma kain, tipu ai-han saida mak família sira konsumu, no estratejia sobrevivénsia prinsipal ne’ebé família sira adopta hodi hatan ba problema atuál ho kustu ai-han aas los no mudansa klimátika mai derepenti durante tinan kotuk.

Entretantu, Alba Cecilia Garzon Olivares, Diretóra no Reprezentante WFP iha Timor-Leste, hato’o pontu importante husi projetu avaliasaun ne’e la’os deit kona-ba númeru dadus, maibé ida ne’e kona-ba fornese dadus krusiál ho tempu ne’ebé loos hodi informa Governu Timor-Leste ba desizaun kona-ba preparasaun ai-han emerjénsia, alokasaun rekursu, no intervensaun protesaun sosial.

Enkuantu, deskobrimentu hirak ne’e mós sei kontribui ba planu klasifikasaun falta seguransa ai-han agudu IPC nian ba 2023 to’o 2024 no sei uza hodi determina númeru ema falta seguransa ai-han ne’ebé aumenta desde análize ikus IPC ba 2022 to’o 2023, hala’o iha Novembru 2022. Rezultadu foun IPC nian sei publika iha inísiu 2024.