Ministru Komersiu no Industria, Filipus Nino Pereira informa, Ministériu ne’ebé nia lidera servisu hamutuk ho Kamara Komersiu Industria Timor-Leste (CCI-TL) fasilita transporte ba kompaña husi munisipiu Kovalima no Vikeke atu lori foos ba fa’an iha munisipiu rua ne’e.

Kompaña lokal rua ne’e, Nino dehan, sosa foos husi importadór ho folin $9 no sei fa’an ho folin masimu $11.

"Ita halo lansamentu distribuisaun foos ba ita-nia komunidade sira iha area rurais ne'ebé ke ita haree vulneravel tebes, ate ke presu foos ne'ebé mak sa’e. Governu fasilita transporte, entaun foos Beruang Merah (20kg) husi kompaña Krearif Furak hasai $9 depois kompaña lokal munisipiu rua, Kovalina ho Vikeke, sira ba faan másimu $11," informa ministru ne’e ba jornalista sira iha nia knaar fatin, Bebora, Kuarta (13/12).

Ba foos ne’ebé kompaña rua ne’e sosa, Ministru informa, kompaña husi Vikeke sosa tonelada 2 no sei lori ba fa’an iha postu administrativu Ossu, enkunatu husi Kovalima tonelada 27 ne’ebé sei fa’an to’o area rural.

"Hanesan Postu Fatumea ami rona katak presu foos sa’e to'o $27 dollar ba kilograma 20, tanba ne'e mak ita presiza halo intervensaun,” dehan nia.

Kona-ba folin, Ministru esplika, kompaña bele fa’an husi $10.50 to’o $11, tanba kompaña sira uza fali transporte rasik hodi lori foos ba area rural.

Ba munisipiu seluk, nia dehan, governu sei haree atu koordena nafatin ho CCI-TL no empreza importador sira.

Aleinde ne’e, nia dehan, gocernu mós sei komunika ho Perisos par bele fornese foos marka seluk.

Iha Fatin hanesan, responsavel kompaña Filoda Lda, Filomeno da Costa Araujo hatete, governu fasilita transporte hodi tula foos ba Postu Administrativu Ossu mak foin sira ba faan.

"Ami sei lori ba to'o area rurais. Agora ha'u sosa ne'e saka ida $9 pois iha ne'e total 600 saka, ne'ebe ami sei faan $10.50. Se ba to'o area rurais entaun $11, ami labele faan liu ida ne'e tanba komunidade presiza tebes foos," dehan nia.

Nia promete atu fa’an tuir presu ne’ebé governu deside ona.

"Se ami la halo tuir entaun ami-nia kompaña sira sei black list,” dehan nia.

Responsavel Kompaña husi Kovalima, Vasco Ferreira da Silva hatete, nia sosa foos saka 1.300 hodi ba fa’an iha Postu Administrativu Fatumea no Postu Administrativu Suai Vila.

Foos hirak ne’e, nia dehan, saka 300 mak sei faan ho presu $11.