Vise-Reitór Universidade Nasionál Timor Lorosa'e (UNTL), Samuel Venancio de Sousa Freitas hatete, UNTL hahú prosesu simu estudante foun tinan akademiku 2024.
Nia dehan, estudante sira-ne'ebe atu asesu ba rejime espesiál dadaun ne'e tuir ona texte durante loron tolu hahú husi loron 12 to’o14 dezembru 2023.
“Estudante ne'ebé tuir texte ne'e ba rejime espesial nia ne'ebé fahe ba kanál tolu, Rejime hakbiit, Rejime filhos veteranus no rejime oportunidade, ne'ebé dadaun ne'e rejime espesáil tuir hela ezame atu bele asesu iha UNTL,” Dehan, Vise-Reitór Samuel, iha nia kna'ar fatin resintu UNTL, Kuarta (13/12).
Nia haktuir, iha tinan akadémiku 2024, UNTL hamutuk ho MESSK ne'ebé konkorda husi Konsellu Jerál katak sei simu estudante foun ne'ebé atu asesu iha UNTL sei la to'o rihun lima.
“Ba tinan akademiku 2024,UNTL sei simu estudante foun, la to'o rihun 5, tanba ami konkorda hamutuk ona no aprova iha Konselhu Jeral katak UNTL sei simu estudante rihun 4 resin ,hanesan vaga define husi motivus barak, tanba departamentu ida-idak mak define nia rasiu, departamentu ida nia kondisaun dosentes, infraestrutura, rekursu aprendizajen, define atu simu hira no departamentu barak mak simu estudante atus 1 resin no balun 80 no mos balun iha departamentu simu estudante aas liu, ho nunee iha tinan 2024, sei simu estudante total hamutuk 4.700 hanesan ne’e,” Nia informa.
Nia reforsa, tanba nùmeru estudante hira mak atu tama hira UNT, Fakuldade ho Departamentu mak determina ema na’in hira mak atu tama iha kada departamentu. Tan ne'e, UNTL sei loke vaga ba Rejime espesáil 30% no Rejime jerál 70%.
Enkuantu, vaga rejime Jerál sei fó de'it oportunidade ba estudante finalista 2023, kandidadu sei priense vaga ne'e banhira simu ona nota ezame nasionál nian husi Ministériu Edukasaun.
Nia fundamenta, bainhira simu ona nota Komisaun Asesõens Ensinu Nasionál Superior (KAENS) sei prepara bulletin, atu sira priense tuir sira-nia nota ne'ebé iha kumpri kriteriu sira mak foin tama UNTL.
“Tanba sei tuir vaga ne'ebé fó sai no vaga ne'ebé fó sai sei la to'o rihun 5, tan ne'ebé sei hadau malu vaga 4.720 ne'ebé UNTL fó liu husi aprovasaun Konsellu Jerál,” Nia akresenta.
