Ministru Asuntu Kombatente Libertasaun Nasionál Gil Da Costa "Oan Soru" hatete, ba veternus sira ne'ebé la satisfaz ho lista dijital 2009 ne'ebé governu taka sai ona tenki halo reklamasaun ka kontestante atu hatama tuir konsellu kombatentes libertasaun nasionál sira iha munisipiu.
Tanba regra no lei klaru ona katak hotu-hotu tenke hatama iha organizasaun.
“La autoriza ema ida-idak hosi ema rihun sia-nulu resin ne’e (92.591) atu ida-idak lori ninian mai hatama, ne’e dez-ordem. Ne’ebé, hatama liuhosi organizasaun. Regra klaru, lei klaru, loron 60 klaru. Ne’ebé, sira halo reklamasaun hatama mai. La’os ita bá, koalia fali buat ne’ebé mak fora hosi regras ne’e,” dehan Ministru Oan Soru, ba Jornalista sira, iha Palasiu Governu, Kuarta (22/01/25).
Governante ne’e hatutan, dadaun ne’e Ministeriu Kombatentes Libertasaun Nasional sei la halo buat ida relasiona ho lista dijital ne'ebé taka sai ona, maibé sei halo tuir dekretu lei ne'ebé iha ona.
No bainhira liu husi reklamasaun ne'ebé iha maka la rezolve kestaun hirak, ministeriu sei buka fila-fali solusaun seluk.
“MACLN la halo buat seluk hodi gaña ema ida nia fiar. Halo tuir lei de’it. Lei hatete to’o iha ne’ebé, halo tuir ida ne’e. Ne’e de’it, ita seidauk halo reklamasaun, labele tau uluk kestaun katak, ne’e reklamasaun la rezolve. Halo tiha mak resolve,”katak Ministru Oan Soru.
Enkuantu, tuir dadus ne’ebé iha, veteranus ne'ebé rejistu iha tinan 2009 hamutuk rihun 124.782.
Hafoin liu husi prosesu verifikasaun ikus mai hetan ema hamutuk nain rihun 92.591 ne'ebé lista taka sai ona iha loron 15 fulan janeiru tinan 2025.
Hosi númeru ne’e, ema na’in-14 mak ho grau 20/24, sira ne’ebé 15/19 hamutuk 186, ema ne’ebé 8/14 hamutuk 9.375, sira ne’ebé ho inkapasidade de servisu iha 359, sira ne’ebé Mártires iha 22.252, sira ne’ebé Prestasaun Pekuniária Únika (ka PPU), hamutuk 23.560, sira ne’ebé menus hosi tinan tolu (3) hamutuk 35.281, no sira ne’ebé Naun-Kombatente totál 1.574.
Estatutu Combatentes Libertação Nacional (CLN) Lei Númeru 3/2006, loron 12 fulan-Abríl, ne’ebé altera dala-rua ho Lei númeru 9/2009, loron 29 fulan-Jullu no Lei númeru 3/2024, loron 12 fulan-Juñu, lísta sira ne’e taka sai hotu bá publiku iha loron 15 fulan-Janeiru tinan ida ne’e.
