Ministro Obras Públika Samuel Marçal hatete, komunidade afetadu sira dadaun governu rekolla ona sira nia dokumentus no hein de'it atu halo prosesu pagamentu.

"Familia afetadu tinan-tinan ita rezerva osan millaun U$2 ba sira ne'ebé mak hetan eviksaun, foin dadauk dadus foti hotu ona, ita hotu hatene katak agora dadaun orsamentu foin hahú atu ezekuta iha loron 8 ka 9 liu ba, agora sei ajusta hela sistema, buat sira ne’e hotu parte edifisiu jeral diresaun hahú rekolla hela sira nia konta bankaria no eleitoral par ita hahú ona prosesu ba sira," deham Ministeru Samuel iha Palásiu Governu, Kuarta (22/01/25).

Governante ne'e esplika, ba komunidade afetadu governu la hasai de'it maibé sei rekopera fila-fali sira nia sasan ne'ebé sira lakon, tanba governu esforsu makas atu nune'e bainhira komunidade sira nia konta bankaria tama hahú pagamentu ona.

Iha biban ne'e, governante ne’e mós apela ba komunidade afetada sira ne'ebé durante ne'e fuan moras no tanis maibé fiar katak iha loron ikus hanesan timoroan sei kontenti fila-fali tanba hotu-hotu harakak nasaun ne’e lao ba oin, tanba sira mós kontribui ona ba propesu dezenvolvimentu liu husi sakrifika sira nia sentimentu.

Enkuantu, Ministru Samuel akresenta liu tan, komunidade afetada sira iha Aitarak-Laran, Bidau Sengol no Bidau Santa-Ana maioria selu hotu ona.