Xefe Suku Bidau Santa-Ana, Alexandrrino Marques da Costa Braz hatete, relasiona ho komunidade Bidau Santa-Ana ne'ebé hetan eviksaun iha loron 18 fulan Abril Tinan 2024 husi parte governu liu husi Sekretaria Estadu Asunto Toponímia no Organizasaun Urbana (SEATOU), to'o agora seidauk hetan indiminizasaun.
"Ha'u hakarak hatete de'it ba publiku katak komunidade ne'ebé mak sai vitima ba eviksaun husi SEATOU iha tinan kotuk liu bá sira to'o agora seidauk hetan indiminizasaun husi parte governu," dehan Xefe Suku iha mia knar fatin Bidau Santa-Ana ba Jornalista INDEPENDENTE, Sesta (24/01/25).
Xefe Suku hatutan, iha loron 14 fulan-Janeiru tinan 2025, Xefe Suku ho nia komunidade rasik ne'ebé hetan eviksaun bá iha Ministériu Obras Públika nia fatin hodi husu parte governu atu halo klarifikasaun kona-bá levantamentu dadus ne’ebé antes ekipa konjunta ne'ebé lidera husi SEATOU rekolla ona.
“Bainhira ami to'o iha ne'ebá diretor rasik halo esplikasaun detellu katak lista ne'ebé sira halo levantamentu dadus agora dadauk submete ona ba iha Ministeriu Obras Públika, informasaun ne'ebé sira pasa mai ha’u ho komunidade sira mak lalais ka tarde osan sei tama," katak Xefe Suku.
Lider Komunitáriu ne'e hatutan, relasional ho informasaun ne'ebé Ministru Obras Publika Samuel Marçal hatete osan tama ona sira nia konta bankaria.
Maibé nia parte hatete komunidade ne'ebé hetan eviksaun husi parte SEATOU ninia liuliu iha suku Bidau Santa-Ana to'o agora seidauk iha konta bankaria.
Nia dehan komunidade sira atu hatama konta bankaria maibé Xefe rasik impede tanba noa parte seidauk simu despaisu husi Ministériu relevante ruma.
"Sé Exelensia Ministru Obras Publikas hatete katak osan agora dadaun tama ona sira nia konta bankaria ha'u hanoin ida ne'e lalaos,tanba ha'u rasik simu komunidade sira ne'ebé hela ha'u nia área ne'e sira rasik mak ezije ha'u atu hatama sira nia konta bankari," nia aumenta.
Iha sorin Xefe Suku Akadiru-Hun, Juvinal da Conceição hatete, komunidade sira ne'ebé hela iha área Bidau Sengol nia hahú husi eviksaun to'o agora seidauk hetan indiminizasaun ka ápoiu ruma husi parte governu.
"Ha’u atu klarifika de'it, ha'u nia komunidade sira ne'ebé hela iha area exsengol katak hahú husi Sekretaria Estadu Asunto Toponímia no Ogrnazisaun Urbana hasai sira seidauk iha kompensasaun ka ganti rugi ba sira durante hahú to'o agora," dehan Xefe Suku Juvinal.
Entertantu, molok ne'e Ministru Obras Públika Samuel Marçal, hatete, komunidade ne'ebé afeta bá evikasaun maioria hetan ona indiminizasaun husi governu.
"Komunidade Bidau Sengol Bidau Santa-Ana maioria ne'e ita selu hotu ona no Aitarak-laran ho Rai-Kotu ne'e ezemplu di'ak ida," katak Ministru.
Entertantu, tuir dadus ne’ebé iha, komunidade afetada husi suku santa ana hamutuk 41 no bidau sengol hamutuk uma kain 92.
Enkuantu, komunidade ai-tarak hetan hotu ona indimizasaun.
