Ministro MDRHC Mariano ASSANAMI Sabino hatete, prosesu dezenvolvimentu nasionál la’o durante tinan 20-resin ona, governu troka malu, maibé IX Governu mak foin ba da-huluk kria ministériu espesifiku ida hodi haree liu ba dezenvolvimentu rurál.
Nia esplika, durante ne’e dezenvolvimentu iha setór edukasaun, saúde, infraestrtura bázika sira hanesan, bee-moos, eletrisidade, estrada no sira seluk tan, la’o to’o ona iha suku no aldeia, entaun ministériu ba atu organiza hodi ajusta programa sira ho integradu.
“Ministériu Dezenvolvimentu Rural nia objetivu prinsipal mak atu halo movimentu ho povu servisu makas lori moris di’ak nune’e povu bele iha integridade,” dehan, Ministru MDRHC, iha Salaun Parokia Luro, Sesta (26/01).
Vise-Primeiru Ministru informa, ministériu ne’e nia aprosimasaun mak atu kapasita, hasa’e koñesementu povu nian atu hatene potensialidade hotu-hotu ne’ebé sira iha hodi dezenvolve nune’e bele fó kbi’it ekonómiku ba sira iha futuru.
Governante salienta, ministériu sei halo movimentu ho povu iha ne’e, la signifika katak sei halo mesa-mesak dezenvolvimentu iha ne’e, maibé sei servisu hamutuk ho ministériu hotu-hotu atu bele implementa nia programa tuir prioridade ne’ebé aldeia no suku iha.
“ezemplu, joven hakarak atu dezenvolve sira nia talentu mak sei liga Ministériu Juventude Desportu Arte Kultura (MJDAK), atu sira bele haree, agrikultura sei servisu hamutuk ho Ministeriu Agrikltura, Estrada sei ko’alia ho Ministeriu Obras Públika (MOP) atu tau atensaun, tanba ne’e MDRHC ne’e mai atu organiza ida ne’e,” esplika nia.
Ministru akresenta, Programa dezenvolvimentu rural hahú implementa uluk iha Postu Administrativu Luro, ne’ebé sei benefisia ba suku lima ho nia aldeia hamutuk 21.
Programa ne’e importante tebes, tanba ne’e xefe suku no aldeia sira presiza tuur hamutuk ona hodi identifika poténsia sira suku nian, nune’e ba oin bele aprezenta ba tékniku sira ne’ebé atu mai servisu hamutuk ho inan aman sira iha baze.