Ministra Elia ne’ebé sei ‘defende’ Sali-Magu to’o Tribunal Featured

By Ekipa INDEPENDENTE Fevereiru 16, 2024 160
Ministra Saude, Elia dos Reis Amaral. Foto:Media MS. Ministra Saude, Elia dos Reis Amaral. Foto:Media MS.

DILI:  Ministra Saude, Elia dos Reis Amaral, sei la hakiduk ba desizaun ne’ebé nia foti relasiona ho ajudikasaun direita ba kompaña Sali-Magu Unipesoal Lda. hodi sosa aimoruk no produtu mediku.

Ministra Elia deklara, nu’udar sidadaun di’ak no nu’udar Ministra Saude, nia sei kolabora ho justisa.

“Konforme ita-boot sira akompaña katak bankada Fretilin hatama ona keixa ba tribunal. Ita-boot sira hatene katak nu’udar sidadaun, nu’udar Ministra da Saude, prontu ho ha’u-nia disponibilidade, ho prazer e norme prontu atu ba hatan ba iha preokupasaun sira ne’ebé mak husi bankada Fretilin hatama. Laiha problema. Ha’u prontu atu koopera ho seitor justisa,” dehan Ministra Elia ba jornalista sira hafoin reuniaun Konsellu Ministru, iha Palasiu Governu, Tersa (13/02).

Kona-ba aimoruk kontentór tolu ne’ebé hatama, Ministra ne’e ‘defende’ katak aimoruk ne’e kompaña Sali-Magu mak hatama.

“Ha’u simu delivery husi kompaña ne’e rasik fó, Terceira vez mak (aimoruk kontentór tolu) agora daudauk ita simu. Depois ita hein tan semana ida ne’e tan par nia bele fó informasaun ba prosesu tuir mai,” dehan nia.

Kona-ba kompaña Sali-Magu uza INFPM nia naran hodi hatama aimoruk mai Timor-Leste, Ministra ne’e dehan, nia seidauk simu informasaun ba kestaun ne’e.

“Ne’e ha’u seidauk simu informasaun, maibé ita-boot sira hatene katak kontratu ne’ebé mak kompaña ne’e rasik asina, tenke kumpre ba kontratu refere,” dehan nia.

Iha Tersa (06/02), horseik, Prezidente Bankada Fretilin, Aniceto Longuinhos Guterres, akompaña husi deputada Nurima Ribeiro Alkatiri no Helena Martins Belo, hato’o keixa ba Prokuradór Jeral Repúblika (PJR).

Prezidente Bankada Fretilin, Aniceto hatete, polemika kona-ba falta aimoruk, materia konsumavel no produtu farmaseútika iha fasilidade saúde sira, hahú husi postu saúde, sentru saúde to’o ospital, kontinua sai preokupasaun públiku nian.

Maibé, nia dehan, Governu, liu husi Ministra Saúde, Elia dos Reis Amaral, tenta desvia hodi soe kulpa ba governu anterior no tenta atu subar realidade loloos.

Bankada Fretilin, nia hatutan, buka atu kompriende kauza husi problema falta aimoruk, no liu husi fiskalizasaun no ezaminasaun dokumentu sira relasiona ho prosesu sosa aimoruk deteta faktus balun ne’ebé levanta suspeita katak problema ne’e mai husi prosesu hili kompaña ne’ebé atu sosa ai-moruk ho kareter urjensia.

"Tuir mai aprezenta faktu no informasaun sira ne’ebé Bankada Fretilin konsege rekoila relasiona ho prosesu hili kompañia hodi sosa ai-moruk," deklara Aniceto liu husi komunikadu imprensa ne'ebé INDEPENDENTE asesu, Tersa (06/02).

Bazeia ba dadus balun, nia dehan, iha 6 Setembru 2023, SAMES,IP. hato’o pedidu autorizasaun ba Ministra Saude kona-ba nesidade aimoruk, material konsumaveis, no sasan ospital ba hospital nian hamutuk 946 items, atu sosa ho urjensia ho orsamentu retifikativu ne’ebé aprova iha 25 Agustu 2023, ho montante $6,000,000.

Tuir dekretu lei númeru 18/2015, ne’ebé aprova kriasaun SAMES,IP. no nia estatutu, hodi regula katak SAMES,IP. iha kompetensia eskluziva ba sosa aimoruk no produtu farmaseutika, armazena no distribui.

Maibé, Aniceto dehan, Ministra Elia deside halo prosesu aprovizionamntu rasik ba sosa aimoruk refere.

Iha loron ne’e kedas, Aniceto dehan, Ministra liu husi despaixu nú.11/MS/IX/2023, indika kompaña Sali-Magu Unipessoal, Lda. ho razaun iha kapasidade atu sosa ai-moruk, mesmu Sali-Magu iha de’it esperensia iha area konstrusaun no laiha esperensia sosa aimoruk.

“Liu husi despaixu ida ne’e duni estabelese ekipa avaliasaun no husu atu haruka konvite ba kompaña Sali-Magu hodi aprezenta caderno encargos no proposta.

Tuir dadus, nia hatutan, kompaña Sali-Magu Unipessoal, Lda. foin bele hetan lisensa atividade negosiu ba sosa aimoruk no produtu farmaseutika husi SERVE iha 8 Setembru 2023 no hetan lisensa operasional ba Rejistu Importadora husi Ministériu Saude iha 29 Setembru 2023.

“Katak kompaña hetan tiha konvite mak foin trata nia lisensa atividade.”

Iha 18 Outubru 2023, Ministra Elia ho Kompaña Sali-Magu ne’ebé reprezenta husi Sansão Gomes nu’udar Diretor, asina kontratu ho valor $5,999,990.07, no kompromete atu hatama sasan, tuir kontratu ne’e loron 40 hafoin asina kontratu, maibé realidade to’o agora kompaña seidauk bele hatama sasan.

“Haree ba faktu hirak ne’e, Bankada Fretilin iha suspeita boot tanba haree hanesan iha indisiu forte katak senhora Elia dos Reis Amaral, Ministra Saude, pratika krime abuso de poder, favoritismo no potensia ba partisipasaun ekonomika iha prosesu ajudikasaun direta ka hili kompaña Sali-Magu Unipessoal Lda,” Aniceto deklara.

Tan ne’e, nia afirma, Bankada Fretilin, ho baze ba artigu 211 kodigu prosesu penal, hato’o partisipasaun ka keixa ba Ministériu Publiku atu bele loke investigasaun klean ba prosesu ajudikasaun direta ba kompañia Sali-Magu Unipessoal Lda, no nia prosesu akizisaun ka sosa aimoruk no produtus farmaseutikus ne’e rasik.

Rate this item
(0 votes)

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30