Prezidente Repúblika, ho ksolok fó pose ba Ministru Justisa foun, ne’ebé iha kareira brillante ho dezempeñu di’ak, iha setór justisa, hodi revela funsaun sira, tanba antes ne’e Sérgio Hornai hanesan Defensór Públiku no Komisáriu Komisaun Anti Korupsaun (KAK).
“Setór Justisa hanesan pillár ida importante iha estadu direitu demókratiku, setór justisa ida kompetente, idónia, indepedente, parsiál, ida ne’e sei halo balansu no ekilibra ba faktu,” dehan Prezidente Repúblika Iha Palasiu Presidensial Aitarak Laran, hafoin fó tomada posse ba Ministru Justisa, Kinta (15/02).
Xefe estadu Afirma, setór justisa mak pillár boot ida iha estadu demokrátiku, tanba ne’e, papél Ministru Justisa nian kabe, ba kria kondisaun atu bele apoiu setór justisa no buat nesesáriu ba administrasaun finansas, infra-estrutura, seguransa.
Nune’e, servidór justisa hotu sei hala’o funsaun ho previlizidade, trankilu, no sira seluk tan.
Prezidente Salienta, MJ tenke tau atensaun boot ba defensória públika ne’ebé sai abut ba setór justisa iha nasaun demokrátiku Timor-Leste.
Tanba TL ho kondisaun sosiál, ekonómiku nasaun nian, defensória públika hola pozisaun ida importante ba kazu ne’ebé julga no provavelmente ho rezultadu la justu, presiza tebes defensoria públika nia atensaun.
Nune’e, Xefe Estadu fiar katak, sei iha susesu boot ba Ministru Justisa nia servisu no funsaun foun, no onra ba nasaun ida ne’e, no mós ba ministru sesante sira ne’ebé antes ne’e fó mós dedikasaun iha MJ hodi servi estadu direitu demokrátiku.
Entretantu, MJ Sérgio de Jesus Fernandes da Costa Hornai, agradese ba konfiansa tomak husi povu, governu, no partidu polítiku sira ne’ebé iha Parlamentu Nasionál, liliu partidu governu nian, ne’ebé fó konfiansa hodi indizita nia, sai hanesan substitutu ba saudozu maktoban Amândio de Sá Benevides.
“Ha’u hakarak agradese ba konfiansa husi povu, Governu, Xefe Governu, Partidu Polítikus sira hotu iha Parlamentu no partidu governu nia ne’ebé fó konfiansa hodi indijita ha’u sai hanesan subtitutu ba iha ha’u nia kolega saudozu maktoban Amândio de Sá Benevides, ne’ebé ohin ha’u simu responsabilidade ida la’os oportunidade,” katak nia MJ atual.
Sérgio Salienta, responsabilidade ne’ebé nia simu ne’e difísil, tanba iha dezafiu lubuk ida mak sei infrenta kona-ba konsolidasaun iha estadu direitu demokrátiku iha setór justisa nian, ne’ebé governu fó depozita konfiansa atu bele hamutuk halo integrasaun ida tantu bilaterál, nasionál no multilaterál.
Enkuantu, governante ne’e promete, sei asume knaar ne’e ho responsabilidade tuir polítika no programa nonu governu konstituisional nian.