Administradór Munisípiu Covalima, Francisco de Andrade hatete, iha Munisipiu Covalima dadaun ne’e fós ho kuantidade 20kg sa’e $20 to’o $22 dolares, tan ne’e husu ba governu liliu parte relevante sira tenki halo intervén lalais atu nune’e povu kbiit laek sira mós bele sosa.
“Oras ne’e dadaun fós saka ida balun folin sa’e to’o $20 no $22, liliu iha área remotas hanesan Fohorem, Fatumea no fatululik, no folin fós ne’e depende ba negosiadór sira fa’an tanba ne’ebá ne’e difisil,” dehan Administradór ba Jornalista INDEPENDENTE liu husi Via Telemovel, Kinta (15/02).
Nia dehan, fós folin sa’e hahú kedas iha fulan Janeiru ne’e ona, maibé nia parte hato’o ona karta ba Sentru Lojístika Nasionál (CLN) atu halo intervensaun lalais maibé seidauk iha resposta.
“ami-nia proposta mai ona iha CLN no ami konfirma hela maibé seidauk iha resposta, tanba liliu iha ita komunidade sira ne’ebé vulnerável atu asesu mai merkadu susar loos tanba ho kondisaun Estrada liliu iha área husi Fatululik, Fohorem no Fatumea ne’e susar, tan ne’e ha’u husu ba Prezidente CLN pelumenus halo netik intervensaun ba Postu sira ne’ebé iha fronteira,” tenik nia.
Nia salienta, parte relevante tenke halo intervensaun lalais, se lae komunidade sira ne’ebé hela iha fronteira sei halo halo ilegál hodi sosa sasan seluk hosi nasaun viziñu hodi sustenta sira-nia moris
“Hanesan imi hatene ami Covalima fronteira entre to’os mak fahe de’it, tanba ne’e mak husu ba governu nasional tenki ho seriedade, liliu parte kompetente atu hare lalais folin fós iha Covalima ne’e,” nia hakotu.