Ministru Interior, Francisco Guterres informa, governu preparadu ona atu halo rekrutamentu ba membru Polisia Nasional Timor-Leste foun.

"Tinan ida ne’e ita sei halo rekrutamentu ba (membru) Polisia Nasional Timor-Leste, ami agora prepara ona kondisaun ba ida ne'e, tanba ita haree númeru PNTL seidauk to'o,” dehan Ministru ba jornalista sira hafoin reuniaun Konsellu Ministru, iha Palasiu Governu, Kuarta (10/01).

Tuir MI nia analiza, nesesidade ideal polisia ida asegura ema na’in 100 resin. Enkuantu realidade polisia na’in ida asegura ema na’in 300 to’o 500.

“Depois area operasaun boot, tinan ne'e ita hakarak rekrutamentu Polisia ho numeru sufisiente bele asegura seguransa ba povu ho nasaun," dehan nia.

Governu, nia dehan, halo ona diskusaun ho Komandu PNTL atu hahú halo rekrutamentu ba polisia foun na’in 250 ne’ebé fahe ba ofisial na’in 100 no ajente na’in 150 efetivus.

"Iha diskusaun ho Komandu PNTL, ami sei halo rekrutamentu ba polisia foun efetivu 250, ne'e tenke hahu ida tinan ne'e. Agora ami prepara hela, espera iha fulan Marsu to'o Abril ne'e loke vaga, halo ona avizu par depois joven sira ne'ebê iha interese hakarak tama polisia bele submete dokumentus," informa nia.

Iha konseitu rekrutamentu PNTL ne’ebé sei halo, nia dehan, atu hamosu polisiamentu komunitariu hodi envolve lideransa komunitariu no joven hodi hametin pas no estabilidade iha komunidade nia leet.

"Parte sira ha’u temi ne'e servisu hamutuk, bainhira akontese kazu ruma sira tenke koordena malu halo mediasaun, liga ba tribunal ida ne'ebé rezolve ona tuir lei, baze legal, ne'e hakotu ona, tau lei ida par ita presiza dame di’ak liu tan."

Tanba ne'e, MI sei halo esforsu hodi diskuti ho tribunal atu bele hamosu projetu lei ida kona-ba mediasaun, nune'e bainhira problema kiik mosu la presiza to'o iha tribunal.

"Ha’u sei koalia ho Tribunal atu hamosu regra, projetu lei ida kona-ba mediasaun, bainhira rezolve problema kiik ruma tenke hetan rekoñesimentu husi tribunal atu labele halakon tiha komunidade nia amizade ho fraternidade ne'ebé sira dezenvolve ho koezaun sosial ne'ebé eziste ona durante ne’e, nune'e odiu malu labele tan, nafatin respeita malu, rezolve problema kiik ho dalan dialogu," nia esplika.