"Reuniaun Primavera Konsellu Governadores Grupu Banku Mundiál no Fundu Monetáriu Internasionál ne’ebé realiza iha Washington DC kapitál Estadus Unidus Amerika, hahú husi loron 10 to’o loron 16 fulan Abríl, iha reuniaun ne'e deskute mós asuntu data fixu vizita Misaun Artigu IV, FMI ba Timor-Leste," dehan Komunikadu ne'ebé Jornalista Independente asesu husi mídia Gabinete Ministeriu Finansas, Tersa (11/04).
Tuir kalendáriu, Governadór Rui Gomes ho delegasaun TL sei hala’o reuniaun bilaterál ho Xefe foun Misaun Artigu IV, FMI ho nia ekipa. Iha reuniaun bilaterál ne’e parte rua sei diskute kona-ba data fixu vizita Misaun Artigu IV, FMI ba TL ne’ebé mak sei realiza iha Segundu Semestre 2023 hafoin TL realiza Eleisaun Parlamentár.
Governadór Rui Gomes ho delegasaun mós sei hala’o reuniaun bilaterál ho Vise-Prezidente Internasionál Finasnce Corporation (IFC) hodi ko’alia kona-ba asisténsia tékniku ne’ebé mak durante ne’e IFC fó mai Governu Timor-Leste partikularmente ba Projetu sira estratéjiku ne’ebé ho modalidade Parseria Públiku Privada (PPP) hanesan Projetu PPP Portu Tibar, Projetu Redezenvolvimentu no Komersializasaun Portu Díli.
Projetu Diagnóstiku Saúde inklui Projetu PPP “Uma Kualidade ho Presu Asesível” ne’ebé Governu konsidera nu’udar direitus umanu báziku no fundamentál ba Timoroan nia saúde no moris di’ak.
Iha ámbitu reuniaun primavera 2023, Delegasaun Timor-Leste mós sei hala’o reuniaun bilaterál ho Diretór Ezekutivu Banku Mundiál grupu konstituente EDS21 ne’ebé mak TL no Portugál hola parte ba.
Aleinde ne’e, delegasaun TL sei hala’o mós reuniaun bilaterál ho Diretór Ezekutivu FMI grupu konstituente Brazíl ne’ebé mak países membru CPLP hanesan TL, Cabo Verde no Brazíl hola parte ba.
Ministru Finansas, Rui Gomes no Governadór Banku Sentrál Timor-Leste, Abraão de Vasconcelos ne’ebé mós hanesan Governadór Suplente Timor-Leste iha FMI sei reprezenta Timor-Leste hodi partisipa iha reuniaun altu-nível ne’e.
Nafatin iha ámbitu Reuniaun Primavera ne’e, Delegasaun Timor-Leste mós sei partisipa iha Reuniaun Ministeriál kona-ba “Dezenvolvimentu Umanu” iha ne’ebé Governadór Rui Gomes sei reprezenta Timor-Leste hodi hato’o intervensaun kona-ba dezenvolvimentu umanu iha TL área prioridade importante ida husi Oitavu Governu Konstitusionál ne’ebé mak tau “EMA” nu’udar Sentru ba Dezenvolvimentu.
Entre reuniaun altu nível hirak ne’e, Governadór Rui Gomes mós sei reprezenta Oitavu Governu Konstitusionál hodi hato’o intervensaun iha reuniaun ministeriál entre países membrus g7+ ho tópiku: “Addressing Fragility and Conflict amid New Challenges”. Eventu ne’e organiza husi FMI servisu hamutuk ho Sekretariadu g7+ ne’ebé lidera husi Sekretáriu Jerál g7+, Helder da Costa.
Rekorda kada tinan, Oitavu Governu Konstitusionál lideradu husi Primeiru-Ministru, Taur Matan Ruak aloka orsamentu millaun $1 ba Sekretariadu g7+ hodi apoiu g7+ nia servisu diplomasia iha nível internasionál halo advokasia kona-ba polítika globál hodi responde ba konflitu no frajilidade.
Iha loron 16 fulan abríl, Governadór Rui Gomes sei reprezenta Timor-Leste hodi partisipa no hato’o intervensaun iha Reuniaun Ministeriál entre Grupu Vulnerável 20 (V20).
Durante partisipasaun iha Reuniaun Primavera ne'e, Governadór Rui Gomes ho delegasaun TL hetan akompañamentu husi Enkaregadu Negósius Embaixada Timor-Leste iha Washington DC, Embaixadór António Araújo.
