Ministru Miguel dehan, antes mandatu oitavu Governu nian remata, Governu sei halo uma hamutuk unidade 21 iha Suku Manutasi.

"Ha'u kontenti tebes ohin (horseik) asisti seremonia inaugurasaun ida ne'e, tanba komunidade sira ne'ebé sai benifisariu ba UNP ida ne'e senti kontenti tebes, uma ne'e la'os de'it sira atu hela, maibé sira bele tau matan ba sira nia oan no fámilia sira hotu,” dehan nia iha Suku Manutasi, Ainaro, (11/04).

Governante ne’e hatutan, ba benifisiariu sira ne’ebé hetan ona UNP ne’e, la’os dehan hela ona di'ak no la'os katak moris di'ak ona, maibé imi tenki buka moris nafatin liu husi imi nia servisu hanesan halo to'os no natar atu nune'e bele kompleta liu tan.

Iha fatin hanesan, Administradór Postu Administrativa Ainaro-Vila, Nazário de Araújo husu ba benifisiariu sira atu fó agradese ba Oitavu Governu ne'ebé bele halo uma di'ak ba komunidade sira, no Administradór ne’e husu mós ba benifisiariu sira atu kuidadu mós fasilidade sira.

"Tanba iha ema balun ne'ebé hein hela, katak bainhira mak ha'u hetan, antri iha kotuk hela, maibé ita boot na'in sia ne'e prense duni kriteriu, tenki utiliza uma ne'e ho didi'ak, tenki orijen hanesan uma ne'ebé ohin inaugura, no kuida fasilidade sira ne'e ho di'ak,”nia dehan.

Entretantu, Benifisiaria Filomena Castro hatete, durante ne'e sira hela iha uma aat no nakukun, maibé Governu ne'ebé lidera husi Primeiru Ministru Taur matan bele halo ona uma di'ak no naroman ba sira.

Tanba ne'e, sira hato'o agradese ba Oitavu Governu ne'ebé lidera husi Primeiru Ministru Taur Matan Ruak.

Nune'e mós, benifisiaria ne'e husu ba Governu atu halo mós uma ba komunidade sira ne'ebé seidauk hetan.