Horta Veta Dekretu Lei Sesta Bázika Featured

By Cristina Ximenes Abril 12, 2023 2682
Prezidente Repúblika, José Ramos Horta. Foto: Dok/INDEPENDENTE. Prezidente Repúblika, José Ramos Horta. Foto: Dok/INDEPENDENTE.

DILI: Prezidente Repúblika, José Ramos Horta hateten, dekretu lei programa sesta bázika nia veta tanba eleisaun parlamentár mai daudaun, programa ne’e seibele kontinua hafoin eleisaun liu.

"Agora eleisaun tama daudaun, governu hakarak sesta bázika tan, entaun di'ak liu hein lai eleisaun liu tiha mak kontinua," dehan PR Horta, iha Sentru Konvensaun Dili (CCD), horishehik.

Molok ne'e, Konsellu Ministrus halo ona aprovasaun ba Dekretu-Lei ne’ebé aprezenta husi Ministru Koordenadór Asuntus Ekonómikus (MKAE), Joaquim Amaral, ho objetivu atu estende distribuisaun sesta bázika, ne’ebé estabelese husi Dekretu Lei  númeru 10/2022, loron 4 fulan-marsu, ne’ebé aprova ona medida sira ba reforsu distribuisaun sesta bázika nian ba família Timoroan sira ne’ebé presiza liu no apoiu ba operadór ekonómiku lokál sira no ne’ebé kria ona rejime espesiál aprovizionamentu ida ba efeitu, iha ámbitu planu rekuperasaun ekonómika nian.

Ho aprovasaun ba diploma ida ne’e, prazu distribuisaun sesta bázika, molok ne’e define ona to’o loron 30 fulan-maiu tinan 2023, estende tan to’o loron 30 fulan Juñu tinan 2023, ne’ebé sei suspensa atividade distribuisaun ne’e durante períodu kampaña eleitorál, ne’ebé legalmente fiksa ona ba eleisaun lejizlativa ne’ebé prevee ba loron 21 fulan Maiu tinan 2023.

Rate this item
(1 Vote)

Independente Digital TV