Salariu Minimu ba Traballadór: KSTL Rekomenda Hasae ba $150, MKAE Hatun ba $135 Featured

By Januário Assunção Abril 12, 2023 1217
Osan dolar. Foto:Dok. Osan dolar. Foto:Dok.

DILI: Proposta salariu minimu ba traballadór ne’ebé Konfederasaun Sindikatu Timor-Leste (KSTL) aprezenta ba Governu, desidi hasae salariu minimu husi $115 ba $150, maibé Ministeriu Koordenador Asuntu Ekonomia (MKAE) husu hatun ba $135.

Prezidente KSTL, Almerio Vila Nova hatete, Ministru Koordenador Asuntu Ekonomia labele uza fali nia poder hodi hatun saláriu minimu ne’ebé mak ekipa Forsa Traballu desidi no aprezenta ona iha meza Konsellu Ministru hodi halo diskusaun.

Nia dehan, MKAE labele hatun ona valor salariu ne’ebé mak iha ona lei salariu minimu nian, tanba ekipa ne’ebé forma husi SEFOPE reprezenta governu, CCI-TL reprezenta setor privadu no KSTL reprezenta traballadór hala’o esforsu makas iha terrenu hodi rekolla dadus reál hafoin mak halo diskusaun ba lei salariu minimu nian hodi aprezenta ba Governu.

Nia haktuir, públiku mós akompaña hela molok mandatu governu remata tenke aprova ona dekretu lei salariu minimu, inklui ho valor salariu minimu mais kestaun mak  MKAE uza nia poder hodi hatun fali ba $135 tuir orsamentu grande opsaun (GOP).

“Agora kestaun mak ne’e, proposta ne’ebé MKAE aprezenta ba Konsellu Ministru ne’e la tuir proposta salariu minimu ne’ebe mak husi Konsellu Nasionál Traballu aprezenta,”dehan Almerio Vila Nova ba jornalista INDEPENDENTE liu husi via telephone, (11/04).

Nia esklarese, tuir loloos SEFOPE mak direita ba aprezenta iha Konsellu Ministru, maibé SEFOPE iha fali MKAE nia okos, entaun proposta ne’e submete fali ba MKAE mak lori ba Konsellu Ministru, entaun proposta husi Konsellu Nasionál Traballu montante salariu minimu ne’e direfente ho esbosu dekretu lei salariu minimu ne’ebé mak MKAE hatama ba iha Konsellu Ministru.

“Ida ne’e mak ami lamenta tebes, tanba tuir loloos MKAE aprezenta proposta ne’ebe mak Konsellu Nasionál Traballu aprezenta ba nia (Ministru), tanba ne’e ida ne’e liu husi peskiza ba nesesidade vida traballador, inklui mós inflasaun folin merkadu nian,” tenik nia.

Maske Konsellu Ministru seidauk deside hodi halo diskusaun, maibé KSTL nafatin husu ba governu tenke tetu didiak proposta ne’ebé mak ekipa tripartidaria Konsellu Nasionál Traballu rekomenda, tanba salariu minimu hasa’e deit ba $135 kontinua la sufisiente ba traballadór sira nia moris loron-loron.

Nia haktuir, lei GOP ne’e planu opsaun governu nian, maibé proposta ne’ebé Konsellu Nasionál Traballu hatama ba MKAE tenke mantein ho valor $150.

“Ministru labele uza poder tuir nia gostu de’it, loloos nia lori proposta Konsellu Nasionál Traballu nian ba aprenzenta iha Konsellu Ministru hodi diskute, maibé nia hatun fali ba $135, ida ne’e mak ami la aseita,” hakotu nia.

Molok ne’e, Ministru Koordenadór Asuntu Ekonomiku, Joaquim Amaral hatete, MKAE seidauk bele deside montante orsamentu saláriu minimu ba traballadór sira ne’ebé servisu iha setór privadu.

Nia dehan, proposta lei iha ona meza Konsellu Ministru atu bele halo diskusaun molok mandatu VIII Governu nian remata.

" Ha'u labele dehan lai ninia momenta, tanba agora lei ne’e seidauk aprova, depois aprova mak mosu oin seluk fali, entau ita hein de'it rejultadu diskusaun. Ida ne’e la liu iha ona grande opsaun mais depende Konsellu Ministru mak deside," dehan Ministru Joaquim Amaral iha momentu ne’ebá.

Garante Aprova iha Mandatu,Nia dehan,MKAE seidauk bele garante atu aprova ka lae tanba prosesu agora Ministériu servisu hela hodi bee realiza atu aprova Diploma hirak ne'e molok mandatu governu nian remata.

" Ita halo servisu para atu finaliza lalais, maibé nia valor (Orsamentu) ne'e aprova lai no sai ona mak ita hare, salariu ne’e sa’e ba   ba hira ne'e depende, tanba montante mós iha ona grande opsaun mais ita hein Konsellu Ministru aprova valor ikus ne'e hira," hakotu nia.

Rate this item
(1 Vote)

Independente Digital TV