Ministru Edukasaun Juventude no Desportu, Armindo Maia hateten, iha fulan kotuk inaugura ona projetu konstrusaun eskola ba faze dahuluk nian hamutuk 92 iha munisipiu Baukau.
"Iha fulan ida-ne'e ita sei inaugura tán projetu konstrusaun eskola ba faze daruak nian hamutuk 59. Entaun hela eskola 72 mak ita sei prepara ba faze datoluk tanba agora daudaun sei iha hela prossesu konstrusaun,” nia hateten iha salaun MEJD, Tersa (11/04/2023).
Diretór serbisu edukasaun munsisipiu Bobonaru, Crispin Lopes Moniz hateten, eskola 12 ne’ebé finaliza ona nia konstrusaun hein deit atu halo inaugurasaun ba faze daruak nian.
"Ita mós kontinua halo konstrusaun ba eskola 9 ne’ebé to’o agora seidauk finaliza tanba impaktu husi udan ne’ebé halo transporte labele liu ba mai atu tula material, maibe ita esforsu nafatin atu bele finaliza iha tempu badak,” nia hateten.
Eskola 9 ne'ebé seidauk finaliza projeitu tanba agora dadaun foin atinje 95%, maibé espera tempu besik sei finaliza, husi Projeitu 21 ne'e MEJD Prevee orsamentu $2,409.512,03.
Eskola 21 ne'ebé tama iha projetu komunitária ne'e kompostu husi Ensinu Pré-eskolár tolu, Ensinu Báziku 17 no Ensinu Sekundáriu Jerál ida.
