Diretór Gabinete Relasaun Esterna no Komunikasaun (APC) Anacleto Caetano hateten, durante Semana ida nia laran akontese dezastre naturais iha tipu oin haat, ida tipu rai halai, anin boot, udan boot no ahi han uma iha munisipiu hitu.
Alende ne’e, mota lori vitima na'in rua ho ida naran Adriana da Costa mak lakon, agora daudaun familia hamutuk ho komunidade hetan ona matebian nia isin mate iha 08 fulan Abril 2023 iha aldeia Sirdoli, suku Lourba, postu adminitrativu Bobonaro, Munisipiu Bobonaru.
Anin bo'ot rezulta ai hanehan uma ida iha 01 Abril 2023 iha aldeia Lorai, suku Matai, Postu Adminitrativu Maukatar, Munisipiu Kovalima.
Anin sobu uma ida iha 26 Marsu 2023 iha aldeia Leti, suku Tutuala, postu adminitrativu Tutuala Munisipiu Lautém.
Anin boot sobu uma rua iha 03 Marsu 2023 iha aldeia Noulo, suku Soruk-Kraik, postu adminitrativu Ainaro Villa, Munisipiu Ainaro.
Ahi han uma ida iha 01 Abril 2023 iha aldeia 04 Setembru, suku Comoro, Postu adminitrativu Dom Aleixo.
Ahi han uma ida iha 09 Abril 2023 iha aldeia Lisidere, suku Bidau Lisidere, postu adminitrativu Na'in Feto, Munisipiu Dili.
Anin boot sobu uma ida iha dia 05 Abril 2023 iha Mahata, suku Lelaufe, Sub Rejiaun Nitibe, Rejiaun Administrativa Espesial Oecusse Ambeno (RAEAO).
Ahi han uma ida iha aldeia Makelab, suku Taiboko, Sub Rejiaun Pante Makassar, Rejiaun Administrativa Espesial Oe-cusse Ambeno (RAEOA).
Anin boot sobu uma 14 iha suku Afaloikai, anin sobu uma ida iha suku Matahoi, anin sobu uma haat husi suku Babulu postu adminitrativu Uatulari, anin boot sobu uma ida husi suku Uma Wain Kraik postu adminitrativu Vikeke, Munisipiu Vikeke.
Verifika Hela Uma 478
Autoridade Protesaun Sivil (APC) mós sei halo verifikasaun bá uma 478 ne’ebé hetan estragus husi dezastre naturál iha fulan Janeiru to'o Abril, atu identifika uma ne’ebé tama kategoria a'at kaman, naton no a'at total hodi oferese apoiu rekoperasaun.
Diretór Relasaun Esterna no Komunikasaun (APC), Anacleto Caetano hateten, uma hirak ne’ebé hetan estragus iha direitu tomak atu hetan duni apoiu emerjénsia imediata.
