Minsitru Ensinu Superior Siensia no Kultura, José Honório da Costa hatete, Ministeriu Ensinu Superior Siensia no Kultura servisu hamutuk ho Sentru Nasional Chega, Empreza Públiku (CNC,IP), ne’ebé hetan apoiu husi governu Alemanha, kria mádulu ida no sei entrega bá ensinu superior sira atu nune’e universidade no institutu superior sira bele introdus Timor-Leste nia istória ba estudante sira iha nivél universitariu.
“Buat ida ne’ebé importante tebes ba ita nia rain ne’e, hanesan timoroan ita hotu tenki hatene ita nia istoria, atu ko’alia istoria ne’ebé los ho lolos, dala barak ema ko’alia maibé koalia istoria ne’ebé lalos,” dehan Ministru iha salaun Konferesia CNC Balide, Sesta (28/02).
Tan ne’e mak Ministru dehan, CNC iha inisiativa di’ak servisu hamutuk ho Ministerriu Ensinu Superior halo módulu no hetan apoiu husi Governu Alemanha no módulu ne’e di’ak tebes.
Nune’e, sei distribui ba Universidade sira atu bele hahú ona introdus istoria TL ba estudante sira.
Biban ne’e, Governante ne’e mós hato’o agradese bá CNC no Governu Alemanha no ba hakerek na’in sira ne’ebé fó ona ideia, hanoin no halo peskiza hodi hakerek módulu ne’ebé importante bá Timor-Leste.
“Ohin ita hahú lansamentu no distribui ona ba reitor sira, ita mós tau iha kurikulum nasional ensinu superios atu tinan ida ne’e hahú introdus istoria ba ita nia jovem sira iha universitariu, tanba hare katak jovem barak la hatene istória Timor-Leste nian, ita hahú husi ne’ebé,” katak Ministru.
Iha fatin hanesan, Diretór Ezekutivu CNC,IP Hugo Maria Fernandez afirma, hafoin rona katak Ministeriu kompremitidu atu ajusta materia istoria ba kurikulum nasional.
Tanba, CNC mós fó ona formasaun ba dosente sira husi universidade hotu, no dosente sira kompremete sei introdus materia istoria iha universidade sira hotu.
“Ba oin ami sei kontinua koopera ho Minsiteriu Ensinu Superior Siensia no Kultura, maibé bainhira hein hela politika ne’e atu mosu, ami mós halo ona formasaun ba dosente sira husi universidade iha Dili laran no mós iha ona komprimisaun ho universidade sira atu introdus material ne’e iha sira nia universidade,” Diretor hato’o.
Enkuantu módulu Chega ne’ebé MESSK ho CNC Lansa ho titulu “Manual Ba Dosente Pás no Konflitu, Istória Memoria, Direitus Umanus No Justisa Tranzisional”.
