“Ha‘u mai iha Palásiu Governu hasoru-malu ho Primeiru-Ministru, Kay Rala Xanana Gusmão hodi hala‘o despedida tanba durante ne‘e Xanana Gusmão sai hanesan inspiradór, motivadór ne‘ebé sempre tau-matan, sempre fó oportunidade atu ami bele hala‘o knaar no bele hakat bá oin iha misaun durante iha Timor-Leste, liu-liu iha knaar sira hanesan adidu POLRI,”dehan Don Gaspar da Costa liu husi Komunikadu ne'ebé Online INDEPENDENTE asesu iha pájina ofisiál GPM, Sesta (28/02).
Komunikadu ne’e haktuir, Don Gaspar da Costa husu nafatin apoiu morál hosi Xefe Governu, nune‘e nia bele fila-fali bá hala‘o knaar ho di’ak iha Kuartél Jenerál Polísia iha Indonézia.
Nia mós agaradese no dezeja susesu nafatin iha relasaun amizade entre Timor-Leste ho Indonézia, espesialmente POLRI-PNTL, PCIC ho SNI.
Komissáriu Xefe Polísia, Gaspar Mikel da Costa simu kondekorasaun ho Medalla Órdem Timor-Leste nian hosi Prezidente Repúblika Demokrátika Timor Leste, José Ramos-Horta iha loron 26 Novembru 2024.
Medalla Órdem Timor-Leste nu’udár prémiu aas-liu ne’ebé oferese hosi Estadu Timor-Leste bá indivídu, organizasaun ka instituisaun ne’ebé fó kontribuisaun estraordinária bá povu no nasaun Timor-Leste.
Prémiu ne’e hanesan símbolu rekoñesimentu bá servisu signifikativu sira iha área umanitária, polítika, sosiál, ekonomia, kultura, diplomasia, dezenvolvimentu no mós relasaun internasionál, ne’ebé ajuda dezenvolve nasaun Timor Leste.
Tanba ne’e, prémiu ne’e oferese bá Don da Costa bá dedikasaun ne’ebé nia halo ona hanesan mós alumni Victoria University Melbourne 2006, liu-hosi ninia atividade oioin ne’ebé iha impaktu pozitivu bá Timor-Leste desde hahú servi hanesan Adidu Polísia iha Díli 08 Marsu 2022.
Don da Costa hanesan mós eis-Xefe Relasaun Públika Polísia Nasaun Unidas (ONU) nian iha Áfrika, espesifikamente iha Sudaun no mós Sudaun Súl.
