Ekipa Komisaun Téknika Akompañamentu jogu CPLP lidera husi Koordenadór Jerál Jogu CPLP, atuál Sekretáriu Estadu Arte no Kultura (SEAK), Jorge Soares Cristovão no Prezidente CTA, Jorge Cesar de Carvalho.
Ekipa CTA molok hasoru-malu ho PM Xanana Gusmão, halo ona fiskalizasaun bá infraestrutura desportivu sira hanesan, Estádiu Munisipál Dili, kampu voleiból, Tenis, Basketbola no otél ne’ebé delegasaun ho ekipa atleta sira sei okupa durante estadia iha TL.
“Ida-ne’e hanesan vizita kortézia ida husi delegasaun CTA atividade jogu CPLP, hasoru-malu ho Primeiru-Ministru hodi informa servisu ne’ebé loron hirak CTA halo iha Timor-Leste,” dehan Jorge Soares Cristovão liu husi komunikandu ne’ebé online INDEPENDENTE asesu iha Pájina GPM, kinta (27/02).
Biban hanesan, Jorge Cesar de Carvalho sente ondradu tebes tanba bele hasoru-malu ho Primeiru-Ministru, Xanana Gusmão nu’udár líder mundiál no líder karismátiku.
Nune’e, ekipa ne’e agradese tebes tanba Governu liu-husi Konsellu Ministrus aprova realizasaun jogu ne’e.
“Husu média iha Timor-Leste atu halo sensibilizasaun barak hodi komunidade asiste jogu ne’ebé sei hala’o iha fulan-Jullu, tinan ne’e, tanba jogu ne’e partisipa husi nasaun membru CPLP,” nia dehan.
Ekipa CTA planeia lori delegasaun CPLP no atleta sira vizita fatin turistiku iha Dili, hodi sosa produtu Timor nian nu’udár lembransa bainhira fila-fali ba sira-nia nasaun.
Tékniku CTA, António Manuel da Luz relata, progresu infraestrutura desportivu sira ne’e daudaun la’o di’ak no balun sei termina iha fulan-Marsu no seluk iha iha Juñu, nune’e prepara bá abertura.
Jogu CPLP edisaun ba dala-12 ne’ebé sei hala’o iha Dili, husi loron 17 to’o 25 jullu 2025 sei halo abertura iha loron 19 fulan-Jullu.
Entretantu, nasaun membru sira CPLP nian mak hanesan, Ángola, Brazil, Cabo Verde, Guiné-Bissau, Guiné-Equatorial, Moçambique, Portugal, São Tomé e Príncipe no Timor-Leste.
