Xefe Governu rekoñese katak, atu prodús notísia ida iha jornal ida difísil tebes tanba tenke liu-husi prosesu ne’ebé naruk, tanba ne’e husu bá média Timor Post atu iha Konsellu ida hodi haree informasaun sira molok publika.

“Atu publika de’it notisia ne’ebé viral la presiza Timor Post, maibé Timor Post presiza hasai notisias depois halo investigasaun kle’an. Dala ruma ha’u loke Jornal Timor Post no Jornal sira seluk notisias ho lian Indonezia mak barak. Tanba ne’e sujere, Timor Post prepara jornalista sira bolu joven sira ne’ebé hatene lian Portugués hodi separa notisias Portugués hodi separa notisias Portugués no Tetum. Diak liu tan ho lian   inglés nune’e ema estranjeiru mós bele akompaña kona bá situasaun iha Timor,”dehan PM Xanana bainhira partisipa serimónia aniversáriu ezisténsia Timor Post bá dala-25 iha Bebora, sesta (28/02/2025).

Xefe Governu husu mós atu Timor Post prepara jornalista ne’ebé bele halo análiza kona-bá situasaun no área polítika, ekonomia no sosiál, la’ós atu publika lor-loron maibé fulan ida dala-ida tanba investigativu ne’e la’ós atu bá haree de’it Governu halo saida no la halo saida maibé Jornalista tenke akompaña situasaun globál iha mundu.

PM Xanana apresia ho Timor Post tanba maski hasoru difikuldade oioin maibé esforsu nafatin hodi la’o to’o ohin loron ho idade tinan 25.

Tanba ne’e, hato’o parabéns bá esforsu hosi Timor-oan na’in-14 ne’ebé ho difikuldade oioin maibé susesu bo’ot liu ne’ebé iha maka korazen hodi kontinua no ida-ne’e hanesan vitória ida.

Iha fatin hanesan, Diretór Ezekutivu Timor Post, Jacob Ximenes agradese bá prezensa Primeiru-Ministru, Kay Rala Xanana Gusmão nian iha selebrasaun aniversáriu ezisténsia bá dala-25.

Iha reflesaun, Jacob Ximenes sente lá fasil no hanesan mehi ne’e iha hodi hakat liu tinan-25, maibé la susar mós bainhira hotu-hotu hamutuk bele hakat bá oin nafatin.

Média nasionál ne’e harii ho moto “Unidade, Justisa no Demokrasia” ho nia polítika redasaun mak Independente, Kredível no Kualidade.

Direjente Timor Post ne’e agradese bá Estadu no Governu Timor-Leste tanba rendimentu ne’ebé durante ne’e hetan bo’ot liu mai-hosi Governu liu-liu iha mandatu IX Governu Konstitusionál liu-hosi servisu hamutuk entre Sekretária Estadu Komunikasaun Sosiál (SEKOMS) ho média nasionál sira.

“Rendimentu ne’ebé hetan husi atividade negosiu sira halo despeza ba operasional jornal hodi distribui jornal ba fatin-fatin. Situasaun sira ne’e halo empreza hasoru dezafiu no obstakulu oioin iha parte finansia maibé la hamate vontade no esperensia hodi parte hotu ne’ebé apoiu liu husi servisu hamutuk hanesan monta publisidade iha jornal,”Jacob haktuir.

Kada tinan Timor Post emprega Timor-oan husi na’in-55 to’o 75 no oras-ne’e daudaun funsionáriu ativu hamutuk na’in 58.