Iha ninia mensajen ne’e, Amu Papa afirma importansia husi ema kompara ho rikusoin natural ne’ebé nasaun ida iha.

"Maun alin, inan-feton sira, ha'u hanoin hela saida mak Timor iha nebé di'ak líu aikameli, peska. Buat ne'ebé di'ak liu la'os hirak ne'e. Buat ne'ebé di'ak liu mak ninia povu," dehan Amu Papa iha Tasi Tolu, Tersa (10/09).

Papa Francisco hatete, nia sei la haluha povu Timor-Leste ne'ebé durante ninia vizita hamrik iha dalan.

"Há'u sei la haluha povu ne'ebé hamriik iha dalan, ho labarik sira. Imi iha labarik mane no feto na’in hira. Povu ida ne'e, bu'at di'ak liu ne'ebé nia iha mak ninia labarik sira-nia hamnasa, no Povu ida ne'ebé hanorin ninia labarik sira atu hamnasa, povu ida ne'e iha futuru," dehan Papa Francisco.

Amu Papa husu ba povu no sarani tomak iha TL atu matan-moris no neon-nain, tanba iha informasaun katak iha lafaek balun hakarak atu halakon Timor-oan nia kultura.

"Maibé, imi tenke matan-moris, tanba ema dehan mai ha'u katak iha imi-nia tasi-ibun balun, lafaek sira mai. Lafaek sira ne'ebé nani sai mai bele tata forte liu fali duke ita imajina.”

“Imi tenke matan-moris ba lafaek sira ne’ebé hakarak muda imi-nia kultura, hakarak muda imi-nia istória. Mantein fiel nafatin no lalika besik ba lafaek sira ne'e tanba sira tata no tata maka’as," nia dehan.

Amu Papa dezeja Timor atu tenke damen no husu mós ba povu Timor-Leste atu iha oan barak, tau-matan ba labarik sira ne'e no mós tau-matan ba ferik ho katuas sira.

"Ha'u deseja ba imi Damen. Há'u deseza atu imi kontinua iha oan barak nafatin. Espera katak Povu ida ne'e nia hamnasa mak sira-nia labarik sira. Tau-matan ba imi-nia labarik sira, maibé tau matan mós ba katuas ho ferik sira, tanba sira mak rai ida ne'e ninia memória.”

“Obrigadu, Obrigadu barak ba imi-nia domin. Obrigadu barak ba imi-nia fiar. Avansa ba oin nafatin ho esperansa," dehan Papa.

Parabéns ba governu dasia

Prezidente Repúblika, José Ramos Horta fó parabéns ba governu Timor-Leste ne’ebé hatudu kapasidade hodi mobiliza instituisaun estadu no meiu hotu-hotu nune’e vizita Amu Papa iha Timor-Leste lao ho susesu.

"Ita fó parabéns ba nono governu nia kapasidade mobiliza instituisaun estadu no meius hotu-hotu iha nia poder, kolabora metin ho Prezidensia Repúblika, Nunciatura, Konferensia Episcopál, Sosiedade Sivil ka NGOs, autoridades munisipais, suku, aldeia sira, estudante no joven sira, ordens relizoju, musulmanus no protestante sira, setór privadu sira hotu-hotu, no mós parabéns ba komisaun koordenadora ba Amu Papa nia vizita," dehan PR Horta ne'ebé hakerek iha nia pájina ofisiál facebook, José Ramos Horta, ne’ebé jornalista Jornál INDEPEDENTE asesu, Kuarta (11/09).

PR Horta hatete, orgullu kompañia aviaun Aero Dili ne'ebé tula Amu Papa ba Singapura.

“Parabéns ba Apa Lourenço Ataúro, pilotu sira, staff sira, no mós parabéns ba staff sira iha Aeroportu Internasionál Nicolau Lobato Dili.”

Horta mós apresia ba servisu protokollu Prezidensia Repúblika no Governu nian.

Xefe Estadu orgullu mós ba forsa seguransa no defeza, setór saúde.

“Ita agradese kolaborasaun metin ho Indonézia no Austrália no embaixada sira, ajensia ONU.”

Iha biban ne’e, PR Horta la haluha agradese mós ba média nasionál no kompañia Telekomunikasaun TT.

PR Horta apresia mós ba RTTL ne’ebé hatudu ninia kapasidade tékniku profisionál.

Horta hato’o ninia orgullu ba povu Timor-Leste ne’ebé hatudu domin no sentidu nasaun.

“Nu'udar Prezidente (Repúblika) ne'ebé sempre gava povu Timor iha mundu ha’u sente orgullu boot,” dehan laureadu nobel da pas ne’e.