Arsebisu metropolitanu Dili, Dom Virgilio Kardial do Carmo da Silva hatete, durante Amu Papa nia prezensa iha Timor-Leste, Timor-oan sira, hatudu antusiazmu ne’ebé boot tebes.

Saida mak Timor-oan hatudu durante loron tolu, husi 9 to’o 11 Setembru ne’e, halo Amu Papa rasik admira no hakfodak.

“Bainhira Amu Papa Francisco iha Nunsiatura prepara atu ba iha Tasi Tolu, admira, hakfodak haree povu no sarani Timor-Leste nia fiar.”

“Durante ne'e Amu Papa Francisco rona de'it Timor-Leste nia naran, dehan sarani hadomi Amu Papa, maibé iha loron tolu nia laran nia hela iha Timor-Leste sente duni Timor-oan nia domin ba uma kreda ho Amu Papa Francisco, entaun ita hotu sente kontente haksolok hamutuk durante loron tolu buat hotu la'o di'ak," dehan Kardeal hafoin Amu Papa semo ho aviaun Aero Dili ba Singapura, iha Aeroportu Internasional Prezidente Nicolau Lobato Komoro, Kuarta (11/09).

Tan ne’e, Kardeal lori Amu Papa nia naran agradese ba Timor-oan tomak nia kontribuisaun no komisaun sira hotu bele servisu hamutuk lori susesu ba enkontru boot ida ne'e to'o remata ho di'ak.

Aleinde ne’e, nia dehan, selebrasaun misa solene iha Tasi Tolu halo mundu hakfodak tanba Timor-oan rihun ba rihun mak partisipa iha misa ne’e.

"Situasaun iha Tasi Tolu hatudu ba mundu hakfodak ho Timor-oan nia fiar ba uma kreda Katólika, entaun lori uma kreda nia naran ho Governu ha'u hakarak agradese ba labarik kiik to'o inan-aman sira hotu, tanba kolabora masimu tebes buat hotu la'o iha pas ho hakmatek," katak Dom Virgilio Kardeal.

Misa solene ne’ebé prezide husi Amu Papa, tuir Kardeal ne’e, hatudu domin ne’ebé refleta duni ba tema ne'ebé hakerek hodi simu vizita Amu Papa Francisco mai Timor-Leste.

"Iha tema ne'ebé ita hakerek simu Santu Papa Francisco mai Timor-Leste ne'e hatudu katak ita-nia fiar ne'e komesa hatoma aan, hanorin ita atu hatene hadomi malu, kaer liman hamutuk, entaun misa boot ida iha Tasi Tolu ne'e sai konvite foun ba ita Timor-oan hotu mak ita hamutuk kaer liman tuir mesajen sira ne'ebé nia husik hela mai ita iha loron tolu nia laran," katak Kardeal.

Iha enkontru ikus ho joven sira, nia dehan, iha lia-fuan importante mak joven sira tenke halo barullu no respeita inan-aman.

“Barulu ba buat ne’ebé di’ak nian, labele ba buat aat, entaun kontente haksolok hamutuk, importante.”

“Tenki respeita malu, hahú husi labarik kiik to'o ema ferik no katuas sira. Respeita labarik kiik sira hanesan fini di'ak ba nasaun Timor-Leste no respeita ferik ho katuas sira ne'e hanesan sabedoria matenek ba kiik ho foinsa'e Timor-oan.”

"Liafuan ida ne'e mak sai hanesan osan mean ne'ebé Amu Papa Francisco husik hela mai ita hotu, maske Amu Papa Francisco fila nia husik hela mensajen memoria di'ak ba ita idaidak nia fuan," dehan Dom Virgilio Kardeal.

Previlejiu ba TL

Durante prezensa Amu Papa iha Timor-Leste, sarani sira hatudu antusiazmu no domin ne’ebé boot tebes.

Perigrinu ida, Domingas Neves da Costa ho idade tinan 54 hatete, nu'udar sarani sente previleziu boot tebes, tanba prezensa Papa Francisco nian atu hametin liu tan pas no fiar ba Maromak.

"Ha'u hanesan sarani haree durante inisiu mai to'o ohin loron ikus, ba loron tolu nian ne'e, se ita la partisipa ita triste no lakon fi'ar no ita la konsidera aan nu'udar ema sarani," dehan nia Sentru Konvensaun Dili, Antigu Merkadu, Kuarta (11/09).

Ho prezensa Papa Francisco nian atu konvida sarani sira hotu partisipa hodi hetan bensaun no nafatin fi'ar.

"Iha loron tolu nia laran haluha buat hotu-hotu, oferese aan tomak, tanba Papa Francisco halo viajen ba fé. Tanba ne’e ita mai hein, molok nia fila hodi hetan bensaun."

"Ita festeza ita-nia fi'ar hodi hatudu ba mundu katak ita-nia fiar metin no ba oin persiza hatudu asaun pas ba malu," katak nia.

Iha parte seluk, perigrina Dinha Soriano hatete, tinan lubuk nia laran, foin haree direita Papa Francisco.

"Ha'u sente kontente no orgulu tebes tanba durante ne’e la haree direita, maibé ohin haree direita ho matan,” dehan nia.

Iha sorin seluk, Maria Fernandes, sente haksolok tebes tanba vizita Papa Francisco nian ne'e atu lori bensaun ba rai ne'e no ba sarani hotu.

"Ha'u ho ha'u-nia oan no familia sira seluk, ohin dadersan tuku ualu mai hein iha ne'e. Ha'u sente kontente vizita Papa Francisco lori pas no bensaun ba rai doben no mós ba ami sarani sira hotu," dehan nia, iha Farol.

Entretantu, Julio Pereira hatete, hanesan sarani sente kontente Amu Papa Francisco mai Timor-Leste.

"Maske loron manas ami prontu hein ho vontade tomak iha ne’e hodi simu Amu Papa Francisco," nia dehan.