Komadante Forsa Apoiu Jerál, Koronel Celestino Pinto ‘DAELEBA’  hatete,  Membru FALINTIL-Forsa Defeza Timor-Leste (F-FDTL) nain ualu (8) ne’e ohin sira gradua ona bá lian ingles iha level I to’o level V.

"Ita halo kooperasaun ho Austrália no Portugal tanba Portugal ita hola parte iha Comunidade Paises Lingua Portugues (CPLP) no Austrália ita tenke hatene Inglés, tanba ita hola parte multilateral ho nasun  Amerika, Austrália  no Japan  inklui Malaysia, nune'e ita tenke hatene lian inglés no portugués,” dehan Komadante Forsa Apoiu Jerál Koronel liu-husi komunikadu ne’ebé Online INDEPENDENTE asesu iha Pájina Relasaun Informasaun  FALINTIL-FDTL, Kuarta (18/12).

Koronel Celestino Pinto hatutan, F-FDTL sira tenki aprende Inglés atu nune'e bainhira bá nasaun sira ne'ebé iha kooperasaun ho multilateral no servisu iha nasaun estranjeiru tenki hatene lian Inglés ho Portugés, no la'os bá ne'e de'it, maibé atu kursu bá Xefe Estadu Maiór nian tenki hatene inglés

"Iha kursu akademia no kapasitasaun, ita tenke hatene lian Inglés mak bá Austrália no Amerika inklui fatin sira seluk ne’ebé ita atu determina ita nia akademia tinan ida ne’e, ka tinan oin mai ita tenke prozeta hanesan ne’e, tanba ne’e mak imi preparasaun molok atu bá," tenik Koronel Celestino.

Nia afirma,  instutisaun ne’ebé prepara membru sira ba lian Ingles la’os iha Metinaro deit maibé iha Komponente Terestre, komponente Naval no mós komponente Aéreo Lijeiria ne’ebé hahú prepara diak molok mai iha CICNL.

“Ha’u husu ba Ofisiáis sub-alternu sira atu prepara ba manutensaun bá páz, tanba agora ita iha sudaun de súl inklui ita iha lebanon atu prepara di'ak no kursu bá Xefe Estadu Maiór no kursu observadór Militár nian, tanba ne’e tenke aprende no  hatene lian inglés atu domina materia bainhira la domina mak sei problema bá ita." Koronel ne’e hakotu.