Diretor Rekursu Humanu F-FDTL, Koronel Alberto Pereira dos Santos membru F-FDTL nain 8 ne'e termina ona kursu lian inglês iha nivel 5, durante Fulan sanulu resin Ualu sira remata ona, agora prepara kontinua kursu iha akademia militar.

"Ohin membru F-FDTL nain 8 remata ona kursu lian inglês iha nivel 5 ida ne'e ikus ona ba sira aprende lian inglês hahu iha nível 1 to'o ona nível 5, agora prepara atu kontinua kursu akademia militar," dehan Alberto ba jornalista sira iha serimonia atribuisaun serfikadu ba militar nain 8 ne'ebé remata ona kursu lian inglês iha sentru instituisaun komandante Nicolau Lobato Metinaru(14/12).

Nia informa, Militar ne'ebé hola parte iha misaun apoiu paz ONU minimu sira tenki hatene koalia lian inglês, rona no hakerek, tanba ne'e mak kursu lian inglês ne'e kada Tinan kontinua halo kapasitasaun kursu ba F-FDTL hotu.

"Ejizensia mundu ohin loron ita Laos moris mesak, ita moris hamutuk ho comunidade Internasional, depois ita mós tenki kumpri misaun ne'ebé Governu halo parseiru sira liu liu ONU ita sei ba kumpri misaun apoiu paz, entaun ita tenki hatene lian inglês ne'e importante," informa nia.

Nia haktuir, dadaun membru ofisial superior F-FDTL nain rua kumpri hela misaun iha sudaun do sul, ida ne'e sira preparadu iha kapasitasaun lian inglês molok halo misaun iha rai seluk.

Tanba ne'e Komandu F-FDTL nia Polítika ida mak Kapasita militar sira tenki hatene lian inglês hahu nível baziku aprende konaba kontestu Jeral konaba akademia, depois sira mos tenki hatene terminolojia militar ho lian inglês.

"Ita atu ba kumpri misaun apoiu paz iha ONU ita tenki hatene lian inglês iha Militar, tanba ita nia parseiru laos sidadaun timoroan mesak, maibe ema husi nasaun seluk ne'ebé koalia lian inglês nu'udar lian internasional," informa nia.

Tanba ne'e diretor Rekursu Humanu F-FDTL ne'e mos husu ba membru F-FDTL nain 8 ne'ebé remata ona kursu lian inglês iha nivel 5 labele para ona ida ne'e, maibe sira tenki estuda nafatin.

"Hau husu ba formadu militar Nain 8 ne'ebé remata ona kursu lian inglês iha nivel 5 mak hotu, maibe aprende halo komunikasaun ho lian inglês ne'ebé la hotu, bainhira ita sei moris, entaun labele baruk no moe atu koalia lian inglês, nu'udar save ba moris ema ida idak," hakotu nia.

Iha fatin hanesan reprezenta Embaixadora Austrália iha Timor-Leste Caitlin Wilson treinamentu lian inglês iha Metinaru refleta duni servisu hamutuk entre militares sira, tanba servisu hamutuk loron-loron, iha ne'ebé operasaun ba fasilidade maneja no junta husi membru militar Timorense no Australiano.

Nia dehan durante tinan rua nulu liu, F-FDTL no forsa Austráliano servisu hamutuk atinji ona susesu liu husi treinamentu lian inglês.

"Ohin ita selebra estudantes forsa F-FDTL nain ualu ne'ebé kompleta ho susesu sira nia kursu lian inglês  iha intermediate nivel 5, Parabens ba imi hotu," dehan nia.

Nia afirma, aprende lingua foun ida hanesan tarefa ida ne'ebé inkrivel, presija esforsu durante tempu naruk ho vontade atu kontinua mellora, nune'e presija mos komitmentu, disiplina no persistensia atributu hira ne'e estabelese firmi iha F-FDTL tan ne'e mak estudantes sira bele kompleta sira nia estudu iha ELTF ho susesu tebes.

Enkuantu Timor Leste kontinua dezenvolve trajetu no aumenta kontribuisaun seguransa no stabilidade, konesementu lian inglês iha F-FDTL no Ministeriu Defesa importante tebes, tanba lian inglês hanesan liangua traballador iha ASEA, iha servisu grupu barak no mos hanesan lingua offisial iha Nasoens Unidas nian.

Tanba ne'e Australia suporta Timor-Leste atu prepara Timor-Leste tama iha membru ASEA, no konsultador programa koperasaun defesa Australianu nia servisu iha terenu hamutuk ho kolegas forsa F-FDTL iha Metinaru no Baucau atu ajuda no prepara forsa sira ho maximu hodi bele partisipa iha misaun ONU.

"Ami mos servisu hamutuk ho komponente Naval atu prepara Marineira sira prontu atu simu Timor-Leste nia classe guardiaun rô patrolla iha tinan oin, tanba Timor-Leste nia propriedade soberanu ne'e sei patrulla zona ekonomia eskluzivu no sei garante seguransa maritima iha regiaun hamutuk ho Australia, Indonesia, ASEA no parseiru pasifiku sira," afirma nia

Tanba ne'e lian inglês hanesan konesementu ida ne'ebé atu aumenta forsa F-FDTL no Ministerio defesa nia area relevansia sira kontinua representa Timor- Leste nia interese no ema hotu nia involvimentu iha rejiaun no mundu.

Molok remata diskursu iha nia  observasaun hakarak kongratula graduadus kursu Metodologia hanorin lian inglês ne'ebe halao iha Treinamentu Defesa Internasional Melbourne Australia no mos graduadus Ofisais iha Jervis Bay Australia.

"Ida ne'e mak husi Exelentismu Embassador ba F-FDTL nu'udar representante Timor Leste nia hato'o mai hau no distintu hotu durante nia tempu iha Australia, hau nia sinseridade no obrigadu ba imi hotu tan konvida hau mai partisipa graduasaun iha loron ohin, hau espera bele hasoru fali imi hotu iha futuru oin mai hodi selebara tan estudante sira nia susesu iha ELTF," hakotu nia.