Nia dehan, ema na'in 10 ne'ebé simu ne'e hili ona nu'udar manán nain iha programa kontribuisaun kompetitivu ida ne'ebé suporta husi UN Women, kolaborasaun ho Asuntu Enpoderamentu Feto Palásiu Prezidensiál.
Aplikante sira kria vídeo dokumentáriu badak ne'ebé hatudu sira nia ideia negósiu no oinsá kapitál adisionál bele ajuda dezenvolve sira nia empreza.
"Hau apresia feto sira ne'ebé uza sira nia kakutak no laran atu halo negósiu iha dalan kriativu," dehan Prezidente Repúblika José Ramos Horta bainhira entrega karosa negosiu foun 10 ba feto empreza ki'ik sira iha Kantina Matak Palasiu Prezidensia Bairu-Pite, horsehik.
Nia hatete, simu na'in ida-idak simu karosa negosiu ne'ebé dezeña ho kostume hodi fó espasu inventáriu no fa'an sira nia produtu.
Nune'e, asisténsia ne'e ho objetivu atu haforsa dezenvolvimentu emprezariál ne'ebé lidera husi feto no hametin auto sufisiénsia ekonómika ba uma kain sira ne'ebé simu.
Entretantu, Komersiante kiik Sandra sente kontente tebes tanba hetan ona karosa husi Prezidente Repúblika Ramos Horta, tanba nu'udar feto faluk ida la iha forsa atu sosa karosa ho folin $3 mill.
"Ami agradese tebes bainhira hetan karosa ida ne'e," dehan nia.
Nia haktuir, ema hamutuk 25 mak tuir kompetisaun ne'e, maibé na'in 10 mak liu hodi hetan roda tolu hodi bele fasilita sira.
