Material sira ne'ebé MEJD liu-husi Diresaun Nasionál Asaun Sosial sei apoiu mak hanesan pregu, ai no kalen ba eskola ne'ebé afeitadu ba dezastre naturais iha Munisipiu Manufahi, Lautem no Baukau.

Diretór Nasional Asaun Sosial Eskolar iha MEJD, Joaquim Martins  hateten, material sira ne'e, ministériu prepara hotu ona, hein ekipa verifikasaun hatama relatoriu mai hodi ministeriu distribui material hirak ne'e.

"Saida mak Ministeriu Edukasaun foti, husu apoiu ba ita nia parseiru sira hanesan UNICEF, Plan Internasionál apoiu matérial ba Ministeriu Edukasaun, nune'e distribui ba eskola ne'ebé hetan dezastre, tanba ne'e foin dadauk  ami mós simu ona pedidu husi eskola tolu husi Munisipiu tolu hanesan Manfahi, Baukau no Lautem, ami nia ekipa  tun halo verifikasaun  ba eskola nia kondisaun, depois mak ami fó apoiu ba”, dehan nia ba Jornalista sira iha Salaun MEJD Segunda (26/06).

Nia haktuir, antes ne’e, MEJD fó apoiu ona material ba eskola sira iha munisipiu hitu ne’ebé afeitadu husi dezastre naturais ne'ebé hahú akontese.

“Maibé foin dadauk akontese tan dezastre naturais iha munisipiu tolu ne'e, ekipa  tékniku sira halo ona verifikasaun ba eskola sira”, tenik nia.

Tanba ne'e, hanesan Diretór informa ba dirijentes eskolar sira hotu katak, karik iha eskola balun ne’ebé hetan dezastre, favor informa hela mai iha Ministeriu atu nune'e bele hetan apoiu imediata husi Ministériu. 

Tuir nia, eskola sira ne'ebé hetan dezastre mak hahú husi eskola primaria to’o sekundaria.