Ministru Edukasaun Juventude no Desportu, Armindo Maia hatete, kooperasaun servisu ne'e hahú hala’o ona iha tinan 2021 to’o mai agora no sei kontinua ba tinan lima tan hahú tinan 2023-2027.
“Objetivu husi asina memorandum ne'e, atu hametin kooperasaun iha setór edukasaun liliu atu haforsa programa risku dezastre naturais, alterasaun klimátika, eskola seguru komplexivu, protesaun ba labarik liliu husi biblioteka haleu, violensia bazeia ba jéneru, nutrisaun, íjiene iha eskola no saúde reprodutivu ba direitu labarik sira”, dehan nia iha Salaun MEJD Vila-Verde, Dili, (26/06).
Governante ne’e hatutan, memorandum entendimentu ne'e importante tebes ba setòr edukasaun, liliu atu haforsa foinsa'e sira hodi bele asesu ba edukasaun reprodutiva, hodi foti desizaun kona-ba direitu labarik sira hodi aprende.
Iha fatin hanesan, Diretóra Interina PITL, Fátima Estrela Soares hatete, seremonia asina memorandum ne'e ho objetivu atu kontinua prosesu dezenvolvimentu setór edukasaun ne’ebé durante ne’e MEJD ho Plan Internasional hala’o ona iha munisipiu sira.
“Ohin loron previlejiu boot ida ba iha Plan hodi haforsa liu-tan kooperasaun ne'ebé la'o ona”, dehan nia.
Tanba ne’e, PITL sei hala’o programa no atividade sira ne’ebé lao ona tuir kompetensia Ministeriu Edukasaun nian, husi nivel pre-eskolar to’o ba iha nivel sekundaria.
